Erźań škamok 2026 ijen taštamkovoń 21 čistë
«Jandeksëś» sovavtïze karelën dï altajen keltnen. Erźań kortamoś sonzë servistnësë kadovi keltemeks
Vajgelsë sovavtomaś dï kortamoń gajgemaś važodit Rossijaso erića raśketnen koto kelsë. Erźań valkoctońt jutavtït 2025 ijen medkovsto sajeź, anśak sovavtoms sonzë vajgelsë eli kunsoloms a lisi.
Jovtams kortnimgańt valmolevks jakutoń kelsë, dï maŕams sonzë, lisni medkovsto sajeź. Erźaks — a lisi teveś, kuš erźań keleś «Jandeks Perevodčiksë» omboce ije: son važodi anśak valkoctso.
Taštamkovoń 8-ce čistë kompanijaś sovavtïze jutavtïćanten karelën dï altajen keltnen. Karelën kelent turtov informacijańt anokstïź Karelijań raśken dï regionoń politikań ministerstvaś dï Karelijań sodalma kunškańt Kelen, literaturań dï eŕamopingen institutozo, altajen kelent turtov — Altajpandoń kirdij universitetëś. Vesemezë servisëś važodi teči Rossijaso erića raśketnen keltnede vejksë ťurkań dï kavkso suomi-ugrań keltnen marto. Vajgelsë sovavtomaś dï kortamoń gajgemaś, ten pingstë, ulit anśak kototnen: tataroń, vetken, baškortoń, udmurtoń, marin dï saha keltnen.
Saha kelenten «makśt vajgel» medkovoń 8-ce čistë. Kortamoń škinemaś dï vajgelsë sovavtomaś noldazelt ve škasto jutavtïćasońt, Android dï iOS turtov povlaztnësë dï vešnemasońt; informacijańt maksïze Rossijaso erića raśketnen Kudoś, Raśken tevtnen koŕas federacijań agentstvańt kedkirdemstënzë.
Erźań dï mokšoń keltne liśt jutavtïćasońt 2025 ijen medkovoń 3-ce čistë. Partneroks kompanijaś lemdinze Rossijaso erića raśketnen seke Kudońt dï Ogaŕov lemsë Mordvań kirdij universitetënt, kedkirdemaś — Raśken tevtnen koŕas seke federacijań agentstvańt. Maksoź informacijańt pokšolmadonzo javoľavtomasońt mezejak apak jovta.
Te projektënt korpusonzo purnïlt Saranošso. 2024 ijen čadïkovsto universitetëś javoľavtś ruzoń-erźań jutavtïćado dï čat-botto, jovtaś śado ťožen parado parallelga molića valriśmede dï 8,5 million celkovojs granttońt, «Приоритет 2030» programmańt koŕas — tede min śormadïnek umaŕkovsto. Te korpusońt publikanten nevteź versijanzo, licenzijanzo eli ejtenstënzë jovtnemańt redakcijaś eź muje.
Umaŕkovoń 21-ce čistë redakcijaś kučś universitetën press-službanten koto kevkstemat, jutksost — purnaź korpustnën pokšolmadost, 2024 ijestë javoľavtoź audioservisënt, kona maštï čarkodeme dï škineme erźań kortamońt, ulemadonzo dï sede, uli-a uli panžoź iskuvićatnen turtov informacijaś, konań kis pandozel kirdij grantoś. Melgaval araś kovoń pert.
Jakutoń vajgelent turtov informacijańt maksïze Rossijaso erića raśketnen Kudoś — seke strukturaś, kona lemďazel partneroks erźań valkoctoń tejemstë.
