Erźań škamok kuľa 2026 ijen sunderkovoń 14 čistë · 2 menjutkoń lovnoma
Ruzoń raśkent» sehte vadŕa Rossijaso kedkirdićazo: Zdunov erźaś «Caŕgradoń» rejtingsë vasence tarkaso
Respublikań pŕavtoś, koso erźań keleś kirdevi fakuľtativtnësë, sajś vasence tarka gubernatortnën raśkejutkoń politikań rejtingsënt, kona tejezel «Caŕgrad» institutsońt. Vasence tarkańt maksïź avoľ erźatnen dï mokšotnen kedkirdemań kisë, a «kirdijurovtïća ruzoń raśkent» kedkirdemanzo kisë.
Zdunov sajś vasence tarka ervakovoń rejtingsënt, kona onkstï, kije gubernatortnëde, 2026-ce ijen ožokovsto, sede lamo tejś, topavtomga Nacionaloń kirdij politikań strategijańt 2036 ijen vids. Rejtingeś «Caŕgrad» institutońt etnoreligijań iskuvamotnen centranzo pelde. Te Malofejev Konstantinën, pravoslavijań biznesmenënt mediaholdingenzë, «ruzoń mirën» pŕavt ruportnëde vejkent, strukturazo.
Zdunovoń — 4,80 balt. Melganzo molit Šumkov Vadim (Kurganoń jonks) dï Solncev Evgenij (Orenburgoń jonks) — 4,70, Kondratjev Veniamin (Krasnodaroń čire) — 4,67 dï Drozdenko Aleksandr (Leningradoń jonks) — 4,65. Vete vasencetnen jutkso lijat raśken respublikat araśt, anśak isťa lemďaviks ruzoń territorijat dï čire. Vasence tarkasońt — respublika, konań lemdiź erźatnenen dï mokšotnenen vijsë putoź ekzoetnonimsë.
Baška nominacija
Kuľasońt sehte pokšoś — omboce rejtingeś. Ožokovsto sajeź «Caŕgrad» veti raśken respublikatnen baška rejting «kirdijurovtïća ruzoń raśkent» kedkirdemadonzo, dï tosojak vasenceś Zdunov. Lijaks merems, Rossijań raśken respublikatnen vese pŕavtnën jutksto, sehte vadŕasto uredi ruzoń raśkent langs, eś pŕanzo erźaks lemdića, Zdunovoś. Sonś Zdunov veśt vitkstaś efirsë tirin kelstën ve valdojak a sodamodońt. Rejtingent avtoronzo logikast a kekšit. Sïnst valost koŕas, «ruzoń komponentëś a putovi tesken identičnostent karšo, son sonzë pešti sede tov». Praktikasońt «sede tov peštemaś» — te tarkazonzo aramo. Respublikań školatnesë erźań keleś kadovi tonavtoma luvksoń variativen pelkssë, dï erva škola sonś sï mels, eŕavi a eŕavi son.
Meze kisë maksïź vasence tarkańt
«Zaslugatne» lovoź pezëst. «Caŕgradoń» ekspertnë teškstït respublikań lomanjutkoń eŕamońt Ušakov Feodoroń perka aravtomanzo: erva ije jutavtovi pravoslavijań odlomanen «Peresvet» forumoś, «Znanije» lomańkurońt marto tejezel erivanmo «inevańks» admiraldońt, Saranošso eri-kasï pravoslavijań sonzë lemsë gimnazija. Mejelce vete ijetnen pert respublikaso sťavtozelt dï baslavazelt 20 cerkuvado sede lamo. Erźansedent te riśmesënt mezejak araś. Erźa Stepanoń 150 ijen topodemań ijestënt respublikań lomanjutkoń eŕamońt aravtït ruzoń admiralońt perka. Pravoslavijań gimnazijańt panžiź dï kelejgavtït, źardo erźansent kirdivijeś riksťadize, aktivistnën, lamo ijen pert, eńaldomast langs apak vano.
«Ruzoń mirën» targo
Rejtingeś lisś seke čitnestë, źardo Zdunovoń kočkiź «Vesemodamastoroń ruzoń soborońt» regionoń pelksënzë, pŕavtnëde vejkeks. Te važodemanten sonzë baslavize Kirill patriarhoś. Ve targoń pert respublikań pŕavtonten topodś važodema tarka «ruzoń soborsońt», vasence tarka «Caŕgradoń» rejtingsë dï raśken respublikatnen jutkso, son lemďazel «kirdijurovtïća ruzoń raśkent» sehte vadŕa idićaks. Erźanten — ulevel son alkuks erźaks, avoľ anśak lemdevel eś pŕanzo isťa, — te ulevel avoľ kaštančin tuvtaloks, a diagnozoks. Respublikaś, kona końov langso tejezel erźatnen dï mokšotnen raśken avtonomijaks, oficialen kojsë lovozel vadŕa nevtevksëks avoľ eś raśketnen vanstomań dï kastomań kisë, a sïnst ruztnën jutkso čovoŕavtovomań kisë.
