Kazań ošso lisś erźań kelen eśtonavtïj

Źars Saran ošoś ijestë ijes nevti pŕanzo meľavtïćaks «mordvań kuľturado», kona alkuks araśkak, jutavtï foľkloroń festivaľt, ruzoń pońovaso tejtertnen marto, dï pokščin kojsë tago panži ledstnema kev «mordvatnenen», konat araśt, dï ten pingstë a meľavtï, avoľ anśak set erźatnede, konat respublikańt tombale, Mordvań mastorsotnen kisëjak! A Kazań ošso lisś erźań kelen tonavtnema kniga: sonzë noldïze tataroń knigań noldamo kudo, kedkirdize keltnen kuvalt tataroń kirdij komissijaś, dï son sovaś Tatarstanoń raśketnede tataroń serijas, konas nej sovit erźatnejak.

Tataroń raśkeś lamo kemenkirtań pert ťuri eś respublikasonzo ejkakštnën tirin kelsë tonavtomo meltopavtomańt kisë. Son sonś sodï, meze isťamoś vanoms, koda federaloń centraś pecek-pecek pani raśken tonavtomańt školań luvkstońt. Dï te raśkeś muś vij dï politikań mel, lezdams erźatnenen tejems tirin valonten veľavtoma kedjonks. Te avoľ abstraktoń solidarnośt dï avoľ mazïj tev kuľań tejemga — te konkretën važodema: knigań noldamo kudo, jarmakso kedkirdema, serija, prezentacija, sravtnema.

Arzamazov Aleksej dï Kuznecov Maksim śormadïź knigańt, kona 173 lopaso lezdï lomanenten ušodoms kortamo erźaks, mezejak apak soda: fonetikasto, śormadomaluvsto, vasence dialogtnëstë, lemen dï tevlemen formatnen tablicatnestë, tonadevtnestë, konat vetit ušodïćańt vasence valsto erij kortamos. Erij kortamoś — vejkine, meze javi kelent muzejen eksponatto.

Knigaś śormadoź setnen turtov, kin ruzoks veľavtomaś eź makso kasoms eś raśken kelsë kortïćaks; erźań polatkstnënen, konat ejkakšpingstëst maŕaśt erźań kel babatnen pelde, anśak źardojak eźt tonavtne arseme ejsënzë; lomantnenen, konat teči bažit velmevtems sen, mezent sïnst kedstë nelgiź kirdij mastoroń mašinań melsë, sïnst dï teťast-avast meltnen karšo. Te mašinaś pingetnen pert veľavtïlize erźań kelent trokstaštiksëks, udalov kadovomań tešksëks, sens, mezde eŕavi menems «vejsën progressënten».

Anśak vana tesë eŕavi jovtams sede, mezde a jon kortams kazanen lotksema kudova prezentacijatnesë.

Vejke eśtonavtïjen noldamoś maŕavi erźań lomańkuronten pokš teveks, keńardomań dï sondenzë kortamoń tuvtaloks, anśak te avoľ kuľturań kasomań tešks, te diagnoz kaladomanten, kona topavtoź mejelce śado ijen pert ruzoks veľavtomasońt.

Mastorsońt, kona planoń koŕas a istoži eś raśketnen keltnen, ušodïćatnen turtov tonavtnema knigaś — lamo knigatnestë vejkeś, knigań noldamo planoń ervačin tev: kijak sonzë a teškstasï eŕamopingen teveks. Udalonzo ašti topo ekosistema: kirdij školat, koso tonavtït tirin kelsë; universitett, koso ulit filologijań kafedrat; kuľań sravtnemapelt, konat kortït raśken kelsë; literatura, kona noldavi sval, avoľ čuro teveks.

Mezejak tenstë erźatnen teči araś malavgak isťamo pokšolmaso, kodamo eŕavoľ raśkent alkuksoń meltopavtomanzo koŕas kelen eś kojsë čačoma-kasoma langs. Seks vejke eś eśtonavtïća knigaś, kona noldazel šabra respublikaso, tejevkšni kuľaks, konadońt kortït. Źars Saran ošoś anśak nevtil, koda son meľavtï arseź «mordvań čalkermedent», Kazań ošoś noldaś erźań kelenten tonavtnema kniga.

Tatarstan teize ten avoľ eś problematnen araśčident, sïn ulit sonzë, dï sïn pek stakat, tataroń raśkeś sodï Kremľań keltnede politikańt pitnenzë avoľ knigatnestë, mejelce komś ijetnen eŕamopingestënzë, źardo respublikasońt tataroń kelsë tonavtomańt škazo kirťazel Moskovoń lepšťamosońt, kona pelkstaś respublikańt meltopavtomanzo karšo, eś melsë aravtnems tirin keltnenen tonavtnemańt tevpen teveks, seks tatartnën erźatnen marto solidarnosteś avoľ abstraktoń gumanizma, te set lomantnen solidarnosteś, konat čaŕkodit mezde moli kortamoś eś jorokčint langs nežedeź.

Rossijań mastoroś a lezdï raśketnenen, učoms peldenzë lezdamońt, te učoms eś pŕań jomamońt, seks net raśketnenen, konatnen ruzoń mastoroś nelgi eś tirin kelen langs meltopavtomast, eŕavi lezdams vejke-vejkenen, avoľ rezoľucijatnen mazïčidest.

Uslojtnesë, źardo keleś planoń koŕas eškevi eŕamoń vese jonkstnëstë, kortams ejsënzë melssamoś, tonavtoms sonenzë ejkakštnën, škinems ejsënzë valkoct, terdems vejsën kortamoń sovavtomanzo — te avoľ kuľturań hobbi, te se logikańt karšo aštema, kona kortï erźań kelent maštomas aravtomado, seks erva lomaneś, kona sajsazo eśtonavtïjent kedezënzë dï ušodsï kelenten tonavtnemańt — pokš, sërsëkasïća, ejkakš, Saran ošso, Kazańsë, Novosibirsksë, Stokgoľmsë erićaś — tei politikań kočkamo, natoj źardo sonś a arsijak isťat kategorijatnesë.

Son a jomamos aravtoź — son eri, źars ejsënzë kortït, źars kelenten tonavtnit, źars sonzë maksït ejkakštnënen, źars karmavtït veľavtoms sonzë školatnes dï kirdij vetikurotnes — avoľ koda ekzotika, koda meltopavtoma.