Saran oš turistënt selmsë: eŕamopingen maraľat lamo, a kosot erźatne?

Vana Saran ošov vasencede saś turist. Son jaki eŕamopingen oškunškava dï vastï divań ekskursovodt — sodaviks eŕamopingen maraľań oršamopelsë. Tenzë jovtnit ošońt jutaź eŕamodonzo, vetit anokstaź maršrutnëva, nevtit eŕamopingen tevtnen. Vese nejavi pek erdekevstë dï lamo od meze sodat.

Anśak isťamo jakamosto ulema kadovi vejke pokš asatïks: turistëś a karmi sodamo, kodat raśket erźatne dï mokšotne.

Koda pačti «Vestnik Mordovii» kuľalopaś, tonavtnićatne teťast-avast marto anokstaśt Saran ošoń eŕamopingen oš kunškava nile eś jalgo jakamo maršrutt. Projektën pelkskirdićatne oršamopeltnen stït sïnś. Maraľatnen jutkso — Pugačjov Emeljan, Ušakov admiral dï Napoleon.

Te iniciativas eŕavi putoms mel: ejkakštnë tonavtnit važodeme eŕamopingen material marto, tonavtït ekskursijań tevent dï snartnit nevtems ošońt sede mels tuićaks. Anśak kevkstemaś avoľ tonavtnićatnenen, a projektënt smustenten dï tenen, kodamo Saran ošoń nejavks son nevti oš erićatnenen dï inžetnenen.

Meks Mordvań mastoroń pŕavt ošońt eŕamopingen oškunškado jovtnemasońt araś nejaviks tarka erźań eŕamopingede dï kuľturado?

Pugačjov, Ušakov dï Napoleon — eŕamopingen erva kodamo lopa marto śulmaź maraľat. Anśak ejstëst vejkejak a śulmavi a erźań, a mokšoń eŕamopingent marto. Natoj Pugačjov erźatnen dï mokšotnen marto śulmavi anśak langa-pŕava, a Ušakov — sïnst jat, mankurt dï miića. Isťamo projektëś a jovtni kelde, koj-kirdado, eŕamopingen ledstnemado dï kuľturań tevkadovksto. Źardo turistëś ošońt marto sodaviksëks tejevi anśak isťamo maraľatnen troks, tarkado arsemazo kadovi a peškse.

Saran ošov sams — te avoľ anśak tašto ulćatneva jakams dï sodaviks lomantnede jovtnemat maŕams. Tede baška, te parste sodams raśketnen, konat erit te modasońt, sïnst kelest, kuľturast dï sen, koda sïn teči vanstït eś identičnostest.

Undoks raśketnen eŕamopingest — avoľ anśak jutaź ška, konań lisi nevtems muzejsë eli aravtoms scena langso. Tede baška te kel, kona gajgi ulćatnesë dï lomantnen jutkso, tesken lemť, koj-kirdat, simvolt dï paŕakči nejems kuľturań eśkojčint avoľ anśak pokščisë, erva čin eŕamosojak.

Kortamoś avoľ sede, keľa erva tonavtnića-ekskursovodonten eŕavi nevtems erźań kuľturańt, eli lija eŕamopingen maraľatnen marto projektnë a eŕavit. Kevkstemaś lija: źardo ošoś baži panžoms eś eśkojčinzë, meks undoks raśketne a tejevit te jovtnemańt vide pelksëks?

Turistënten eŕavi uskoms Saran ošsto avoľ anśak divań ekskursovodtnën marto fotot, čaŕkodemajak: kin jutkso son ulneś, kije tesë eri dï kodamo kuľturań tevkadovks eri tečijak.

Raśkenten a eŕavi kadovoms ve jonov eś modasonzo, źars sonzë eŕamopingenzë jovtnit lija maraľat.