RUERZ

«Vejsë, erźat, vijevťano!»

Erźań Mastor

elektronoń kuľakudo — veti sede tov «Erźań Mastor» (lisni 1994-ce ijestë) kuľalopańt tevenzë

Pŕavtlopa · Suomi-ugrań pertpelks

Suomi-ugrań pertpelks kuľa 2026 ijen sunderkovoń 20 čistë · 2 menjutkoń lovnoma

Rossijaso kaśtiź ugrań polons sajeztnenen memorialońt, konań kirdivijtne ikele arseśt kalavtomonzo

Erźań Mastoroń redakcija

Novokuzneck ošso ledstnema kevent langs śormadozel «Fašistt». Źarïja čide ikele pačťavś kuľa: ošoń administracijaś polavtïze melenzë kŕostoń kalavtomado. Te kŕostoś sťavtozel ledstnemga sovetën polonso maštoź ugratnen.

Foto:  Szent Korona Radio
Foto: Szent Korona Radio

Rossijań Novokuzneck ošso a sodavikstnë valïź jakstere artoso lemkundamo lazońt kŕostońt vaksso, kona sťavtozel ledstnemga ugrań polons sajeztnen dï śormadśt langozonzo «Fašistt». Ledstnema kevent kaśťamodo pačťazel kurok sede mejle, koda ošoń kirdivijtne javoľavtśt sonzë a kalavtomadońt.

Sunderkovoń 6-ce čistë socialen altïmatnesë sradovś erivanmo kolaź ledstnema kevdent Bajdajevka bujesë. «Magyar Jelen» ugrań noldavksońt pačťamonzo koŕas, lemkundamo lazońt valïź jakstere artoso, a maštoź polons sajeztnen lemdiź fašistëks.

Kŕostoś, konasońt ruzoks dï ugraks śormadoź «Tesë kalmaź ugrań polons sajeztne, Omboce vesemodamastoroń tortingen anokstnë», sťavtozel 2008 ijestë. Te tejezel ugrań delegacijań iniciativańt koŕas. Delegacijaś vešneś Rossijaso eś raśken lomantnen kalmamo tarkast.

2026 ijen ušodomsto Novokuzneck ošoń administracijaś sovavtïze ledstnema kevent zakonoń karšo sťavtoź tejevkstnën riśmes. Garažtnën dï mikšnema paviľontnën marto vejsë, sonzë karmavtozel kalavtoms medkovoń 1-ce čis.

Melssamońt karšo sťaśt lomańt, konatnen jutkso setkak, kit vanstït ugrań polons sajeztnen ledstnemańt. Seks ošoń kirdivijtne polavtïź melest.

Sunderkovoń 2-ce čistë pačťavś kuľa: ledstnema kevent čerkstïź kalavtomań riśmestë ejźurkovoń 13-ce čistë. Ten jovtïze Novokuzneck ošoń pŕavtoś Iljin Denis, «Om1» rossijań noldavksońt kevkstemanzo langs venksťamsto. Ošoń administracijaś vitkstaś: vasence karmavtomaś maksozel 1995 ijen Rossijań dï Ugrań mastoroń vejsënluvksońt langs apak vano. Te vejsënluvksońt mastortnë teiź ušmanoń kalmotnen vejsë vanstomga, ervaś eś mastorso.

Anśak kalmamo tarkadońt pelkstamoś eź pŕadovo.

Ošoń istorijań dï kuľturań kadomapelen komissijańt pačťamonzo koŕas, ikelen Bajdajevka velent tarkaso, ulema, ulneś kalmazïr: polons sajeztnen 525-ce sovetën lagerent 9-ce pelksën kalmazïreś. Dokumenttnësë jovtnevi 321 kalmaź lomande, anśak raśkečist a nevteź. Kalmazïrent videstë tejeź planozojak eź kadovo.

Arhiven dokumenttnë nevtit lageren kalmazïr langs te bujesë, anśak źars a sodavi, ulit-araśt ugrań polons sajeztnen lovažast samaj te kŕostońt alo.

Ten langs apak vano, ošoń kirdivijtne saśt mels kŕostońt kadoms. Anśak kalavtomańt lotkavtomado pačťamońt noldamodo mejle eź juta targojak, dï ledstnema kevent kaśtiź.

«Acélzivatar» dï «Szent Korona Rádió» ugrań nacionalistën noldavkstnë sravtniź kuľańt te tevdent dï teškstïź: sovetën polonso maštoztnen ledstnema keveś tago liś konfliktën teveks.

A sodavi, kije śormadïze te valońt dï tejś-eź mezejak rossijań policijaś čumotnen mujemga. Iskuvamodo oficialen pačťamot mujems eź lise.

1995 ijen Rossijań dï Ugrań mastoroń vejsënluvksoś karmavtï kavonest mastortnën vanstoms ušmanoń kalmotnen eś modasost. Anśak Novokuzneck ošso ledstnema keveś ašti malav komś ijet, a kalmotnen tarkast videstë źars a sodavit.

Ošoń administracijaś saś mels kŕostońt a kalavtoms. Nej kirdivijtnen ikele lija kevkstema: kije karmi vanstomo ledstnema kevent, konań sïn saśt mels kadomonzo?

Lovnoms šožda valkoctońt →