Pŕavtlopa · Suomi-ugrań pertpelks
Suomi-ugrań pertpelks kuľa 2026 ijen sunderkovoń 16 čistë · 2 menjutkoń lovnoma
Estën mastoroś luvondï, acamkovoń 1-ce čistënt sajeź, pekstams Rossija marto kordonsońt sovamo-lisema tarkatnen
Estën mastorońt uli melezë acamkovoń 1-ce čistënt sajeź pekstams Rossija marto kordonsońt vese kolmo urnïjkań noldamo važodića tarkatnen — Narvaso, Luhamaaso dï Koidulaso. Melssamońt tuvtalozo estën oboronań predprijatijańt kirvastemenzë snartnemaś. Te snartnemańt mastoroń kirdivijtne śulmit Rossijań ušmokivedemańt marto.
Sunderkovoń 15-ce čistë Estën mastoroń premjer-ministraś Michal Kristen, potmo teven ministraś Taro Igor dï ušojonoń tevtnen ministraś Tsahkna Margus jovtaśt kordonoń pekstamodo arsematnede. Pezënzë te melssamońt pŕavtvetikuroś arsesazo sïća čitnestë. Źars a sodavi, uli kordonoń pekstamoś źarïja škań pert eli sval.
Tuvtaloks ulneś «Threod Systems» kompanijańt karšo diversijań snartnemaś. Kompanijaś ašti Viimsi olośtsë, Tallinn oštońt a vasolo. Sunderkovoń 14-ce čistë vet takodat lomańt snartneśt sovamo predprijatijańt territorijas, tejemga kirvastemat-sezemat. Te predprijatijaś škini dï tei dront.
Estën policijaś kirďaś Latvijań kavkso erićat. Estën mastoroń kameľavtomań policijańt (KAPO) pačťamonzo koŕas, kajavomaś anokstazel Rossijań Genštaboń Pŕavt kivedemań vetikurońt meremasonzo. Prokuraturaś eńaldś vete lomantnen, konat nejavit čumoks, arest alov sajemadońt. Vanstïjtnen teventen śukońaź, predprijatijanten pokš zïjan araś, jaraź lomańt araśt.
Michal Kristen, premjer-ministraś javoľavtś: kordonońt pekstamoso arsit viškalgavtoms risktnën mastorońt kameľavtomanten. Valonzo koŕas, Rossijań kivedemań vetikurotne kordonoń troks jutamońt noldït tevs lepšťamga lomantnen langs, a Estën mastoroń oboronań tejmatevent langs kajavomatne annït venks.
Taro Igor, potmo teven ministraś, puterdi pŕavtvetikuronten lotkavtoms urnïjkań noldamo tarkatneva vese jakamotnen — koda jalgo molićatnen, isťa transportońt turtovgak.
Nej Narvaso, Luhamaaso dï Koidulaso noldamo tarkatne važodit erva či 7:00-sto sajeź 19:00 vids. Pačkast jala jutït jalgo dï kanstoń urnïjkaso. Narvaso urnïjkaso kordonoń troks a jutavat nejgak: sëdgańt urnïjkaso ardomaś kardaź.
Taro Igoren valonzo koŕas, Estën mastoroń erićatnenen, konat nej Rossijaso, dï kanstoń urnïjkań vetićatnenen kadovś malav kavto targot, veľavtomga mekev tonadoź kitneva. Noldamo tarkatnen pekstamodo mejle kudov kiś karmi uleme pek sede kuvaka dï staka.
Tsahkna Margus, ušojonoń tevtnen ministraś pačťaś: sïća kardamotnede son kortaś Latvijasto, Litvasto dï Suomi mastorsto tevälganzo marto.
Rossija śaldïnze Tallinnën arsematnen. Rossijań ušojonoń tevtnen ministerstvań peldekortïjeś Zaharova Marija lemdinze kordonońt pekstamodonzo arsematnen rusofobijań nevtemaks.
Źardo pŕavtvetikuroś kemekstasïnze puterdeź onkstnën, acamkovoń 1-ce čistënt sajeź estën-rossijań kordonońt troks jutamoś, urnïjkań noldamo punktnëva, lotkavtovi. Źars kirdivijtne eźt jovta, kuvať a kuvať kardamońt škazo dï kodat tuvtalt ulit noldamga baška lomantnen.



