RUERZ

«Vejsë, erźat, vijevťano!»

Erźań Mastor

elektronoń kuľakudo — veti sede tov «Erźań Mastor» (lisni 1994-ce ijestë) kuľalopańt tevenzë

Pŕavtlopa · Kuľtura

Kuľtura kuľa 2026 ijen sunderkovoń 22 čistë · 3 menjutkoń lovnoma

Panžovś Kilango, erźań noldamo kudo. Vasence knigatne uš lovnovit pandomavtomo

Erźań Mastoroń redakcija

Od noldamo kudoś ušodś Uajld Oskaroń, Defo Danielen dï Ezopoń knigatnestë. Vasence knigatnen jutkso ulit knigat setnen turtov, kit ušodït tonavtneme erźań kelenten: sïnst lovnomga erźaks satït anśak malav 250 valt.

Sunderkovoń 21-ce čistë erźań noldamo kudoś Kilango panžize eś pelksënzë Valks valksońt sajtsënzë. Vasence knigatne — Uajld Oskaroń «Eś pŕań večkića Kodaškaj» jovksoś, Defo Danielen «Robinzon Kruzo» dï Ezopoń koto jovkst. Vese kolmo knigatne lovnovit pandomavtomo inealtïmaso, eli sajevit EPUB, FB2 dï PDF formatso.

Noldamo kudońt jurovtïze Boľajeń Śïreś. Sonzë ťokšmelezë — ulezë erźań keleś avoľ anśak raśken kuľturań keleks, tečin lovnïćatnen eŕamoń kelekskak, koso uli tarka vese modamastoroń literaturantengak.

«Moń araś melem kadoms erźań kelent anśak raśken morotnesë, jovkstnësë dï jutań škadońt ledstnematnesë. Moń melem, lovnovoľt minek ejkakštnë erźaks Šekspiren, Ďumań, Remarkoń, dï kortavoľt kelsënek večkemado, politikado, oľačide — vesemedent, meze meľavtï lomantnen modamastorgańt», — kortï Boľajeń Śïreś.

Śïreśen valonzo koŕas, lija mastoroń sehte sodaviks śormadovkstnën jutavtomaś eŕavi avoľ anśak od knigatnen noldamga. Erva isťamo valkoctoś kelejgavtï kelent vijenzë.

«Min avoľ anśak snartneťano idems erźań kelent jomamodo. Minek melemek, kasovoľ son dï śupalgadovoľ, dï ulevel melest lomantnen lovnoms ejsënzë, śormadoms dï arsemskak», — javi melenzë Kilangoń jurtïćazo.

Knigatnen jutavtït vitstë avtoroń kelstë, avoľ ruzoń jutavtomatnestë. Boľajeń Śïreś jutavtï śormadovksońt erźaks. Mejle lija lomań, konań turtov erźań keleś — tirin, jutavtï erźań valkoctońt mekev ruzoks; avtoroń kelsë valkoctońt son a nei. Kavonest valkoctnën vejsë vanomsto redakcijaś nei, čaŕkodevi a čaŕkodevi jutavtomaś dï vanstovi-a vanstovi śormadovksońt smustezë.

Uajldoń jovksoś anokstaź źarïja luvso. Uli lovnoma valkoct, uli tonavtnema noldavks: toso erva erźań valriśmen alo — ruzoks jutavtomazo, a knigańt pesënzë — valks. Jovksoś uli vajgelsëjak: sonzë lovnïze dï śormadïze sonś Boľajeń Śïreś. Śormadovksoś — malav 12,5 menjutko.

Lija kavto knigatne — «Robinzon Kruzo» dï «Ezopoń jovkst» — «Erźanseś kustimava» serijań vasence knigat. Serijaś anokstaź setnen turtov, kit tonavtnit erźań kelenten.

Serijasońt koto kustimat: 0, 1, 2, 3, 4 dï 5. Erva, melga molića, kustimaś stakalgadï. Sehte alka kustimasońt valtnëde — malav 250. Źardo avtoronten eŕavi lija, od val, son teškstavi viška teškskesë, dï sonzë smustezë jovtavi knigańt pesënzë — erźakskak, šožda valtnësë.

Net knigatnesë ruzoks jutavtoma araś: lovnïćanten eŕavi alamoń-alamoń tonavtnems čaŕkodeme erźań valkoctońt, lija kelenten sval apak veľavto.

Isťa umok važodit tonavtnema literaturań pokš noldamo kudot. Oxford Bookworms serijaso knigatne javoź sisem kustimas, 250 valsto sajeź 2500 val vids. Penguin Readers maksï kavkso kustimat, dï knigatnen marto — valkst dï vajgelsë śormadovkst. Uelsën kelenten tonavtnićatnen turtov, 2018 ijestë sajeź, lisni Amdani serija: toso 40 knigado sede lamo, nile kustimaso.

Kilango važodi te analogijań kojsë erźań kelen marto, anśak sonzë knigatne pandomavtomo. Knigatne lisit panžoź licenzijaso, CC BY-SA 4.0. Sonzë koŕas knigatne maksovit sajems, maksoms lija lovnïćatnenen dï tejems ejstëst lija materialt apak kola licenzijań kojtnen.

Valkoctnë noldaź erźań latinkaso. Sajtsońt uli baška pelks «Koda lovnoms erźań latinkańt».

Noldamo kudoś nej važodi melga molića knigatnen langso. Sehte alka kustimanten anokstït Kollodi Karloń «Kuvasudoń jakamot». Dï anokstït «Tandavtnića jovkst» pusmo: erva kodamo mastoroń śormadejtnen kemgavtovo jovtnemat.

Lovnoms šožda valkoctońt →