Razin Aľbertën kulomadonzo sisemce ijen čistënt, Aťań Ezemeś pškadś erźatnenen

Aťań Ezemeś pškadś Razin Aľbertën, udmurtoń sodïdejent dï raśkekuroń tevendejent, kuloma čistënzë. Dokumentënt kedčelkstïze Sïreś Ińazoroś; erźań eś kojsë arsemaś putoź taštamkovoń 9 čistë Ińazoroń sajtonen. Ruzoks vese valkoctońt redakcijaś putï teske. Aľbert Razin, filosofija sodalmań kandidat, universitetën tonavtïća, „Udmurt keneš“ organizacijańt jurovtïćazo, pultïze eś pŕanzo Ižkarso, Udmurtijań „gossovetënt“ ikele. Sonenzë ulneś 79 ijet. Son kuloś seke čistënt orma panema kudoso. Razin lisekšneś pŕavtvetikuroń kudonten udmurtoń kelen kardamońt karšo plakat marto. Vejkesënt ulneśt valt Rasul Gamzatovoń valmorostonzo: „Mon anokan teči kulomo, źardo moń kelem valske jomi“.

Aťań Ezemeś lemdi Razinën udmurtoń nacionalistëks, kona topavtïze kememado zizemań aktońt, nevtemga vese modamastoronten, Rossijań Federacijaso udmurtoń kelent tarkazo, koda lija raśketnengak, konat kardaź Moskovsońt.

Aťań Ezemen pškadema

2019 ijen, taštamkovoń 10 čistë, Ižkar kunškaso, pultïze eś pŕanzo lomań, kona vese eŕamonzo altïze eś tirin kelen, ineśke raśken, idemanten -vanstomanten. Te vijev lomanent lemezë Aľbert Razin.

Raśkekuroń dï kememań tevendej, filosofija sodalmań kandidat. Moskovoń činovniktne kapšaź lemdiź te aktońt provokacijaks, mujevśt viśkstëme lomańt, konat kortaśt psihen ormado…

Razin Aľbert ulneś prevej lomaneks, udmurtoń nacionalistëks, kona čarkodś eŕamopesënzë: vesemeś mezent son eŕamonzo pert snartneś idemenzë – vanstamonzo a vanstovi, a idevi, a kadovi, jomi čalgavkstomo ruzoń kirdivin pilge alo. Eś pŕań pultamoś ulneś kememań jomamodo aktoks, terdemga lomantnen varštams, nejems, koda kulovtït Ruzoń mastorso udmurtoń kortamońt, koda lija kortamotnengak.

Topavtovś-eź Aľbertën mejelce bažamozo? Topavtovś! Lamo lomańt, koda Ruzoń mastorga, isťa kordon tombaľgajak čarkodiź sïre lomanent melenzë. Anśak jutksost arasel vejak ruzoń činovniktnede. Tirin keltnen kulovtomaś sedejak vijevgadś Ruzoń mastorsońt. Ejkakšonok karmavtït moramo, lemďamo eś pŕantnen ruzoks. Karmavtït lemďamo tirin keleks – ruzoń kelent!

Vejak činovnik eź vizdelgado. Te a topavtovića tev. Sïnś viśksëst umok kośkś.

2022 ijen, panžikovoń 16 čistënt Razin Aľbert, erźa raśken jalgamok, javoľavtozel Aťań Ezemsënt Tediden lomaneks, Erźań Ťokškaznen kavalerëks.

Sï ška, źardo Erźa Mastorso sti udmurt raśken sodïdejent kevrungozo! Lomanent kona eś kulomasońt, kiravstize tolońt melganzo molićatnen meštesëst. Sï ška, źardo ledstnema kevrungoś aravtovi Ižkar kunškasojak.

A teči, erźa, kundïk Razin Aľbertën lemenzë. Kirvaśt štatol. Arsek ejstënzë. Aťaś maksïze eŕamozo vanstomga avoľ anśak udmortoń raśkent… erźa raśkentkak.

Sïreś Ińazoroś