Pŕavtlopa · Erźań Mastor dï regionoś
Erźań Mastor dï regionoś 2026 ijen ožokovoń 14 čistë
2027 ijestë važodemapandomań minimumoś — VPM karmi kasomo sede aštinestë
Rossijań pŕavtvetikuroś puterdi, 2027 ijen jakšamkovoń 1 čistënt sajeź, kepedems važodemapandomań (nuŕkinestë — važpandomań) minimumońt 6,8 procents — 28 935 celkovojen vids. Mejelce kolmo ijetnen pert son erva ije kasś 17–21 procents. Mordovijań važodićatnen lija minimumost araś, koda uli sonzë šabratnen, respublikaś eś VPM-ent ezize aravto.
2024 ijestë VPM-eś kasś 18,5 procents, 2025 ijestë — 16,6 procents, 2026 ijestë — 20,7 procents. Nej zakonoś karmavtï: a ulevel VPM-eś medianań pandomadońt (ruz. медианная зарплата) 48 procentnëde sede alamo. Zakonoń projektëś, konań pŕavtvetikuroś kandïze Kirdijarsikuros ožokovoń ušodomsto, lotkavtï te luvońt 2027–2029 ijetnestë. 2027 ijen važpandomań minimumoś lovoź kunškajutkoń pandomańt kasomadonzo prognozońt koŕas. Ve ijen pert son kasï 1 842 celkovojs.
Mordovijaso važpandomań minimumoś federalonsent marto vejket, — 27 093 celkovojt. Regionońt uli meltopavtomazo aravtoms eś važpandomań minimumońt, federalonsedent sede pokšoks. Ten turtov respublikań pŕavtvetikuroś, profsojuztnë dï važodemań maksïćatne kemekstït regionoń vejsënluvks. Mordovijaso isťamo vejsënluvks araś.
Rav lejen okrugoń šabratnen son uli. 2026 ijestë važpandomań minimumoś Tatarstanso — 28 160 celkovojt, Saratovoń dï Kirovoń bujtnesë — 28 448, Ravošoń bujsë — 27 882. Te federaloń pandomado 3–5 procents sede lamo. Regionoń kolmo bujtnesë važpandomań minimumoś važodi avoľ bjudžetën sektorsońt (ruz. внебюджетный сектор).
Taštamkovoń 28-ce čistë Mordovijań pŕavtvetikuroś, Profsojuzoń federacijaś dï Respublikań promïšlenniken vejsënďavksoś, sovavtïź eś kolmojonksoń vejsënluvksozost SUO-so pelkskirdićatnen nežedemado regionoń standartońt. Standartońt vejkeś tevtnede — Mastoroń vanstomań ministerstvańt marto kontraktoń tejemań kisë, važodićanten jarmak maksoma. Važpandomań minimumdo vejsënluvks jutksost araś.
Tatarstan dï Saratovoń, Kirovoń, Ravošoń bujtne 2026 ijent langs vejsënluvkstnën kemekstïź 2025 ijen acamkovsto.
