Ušmovijs sajemaś moli ijen pert. Śoksńa Mordovijasto dï Penzań jonksto ušmovijs kučit malav vejke ťoža kotośadot lomańt

Vese ijen pert ušmovijs sajemańt sovavtïze zakonoś, konań kedčelkstïź 2025 ijen sunderkovoń 4-ce čistë. Karmavtomasońt, acamkovoń 29 čistënt, 2026 ijestënt karmavtoź sajems 261 ťoža lomańt. Medkomissijatne dï sajemań komissijatnen kortamotne nej molit ijen pert. Ušmovijs, koda ikele, kučit kavtoń kirda: čadïkovoń 1 čistënt sajeź, medkovońt 15 činzë vids dï ožokovoń 1 čistënt sajeź, acamkovońt 31 činzë vids. Genštaboń pačťamonzo koŕas, te śoksestënt uredeme tuit malav 120 ťožent lomańt.

Nikolaj Viďajkinën, respublikań ušmovijen komissarońt valonzo koŕas, Mordovijasto kučit malav 500 lomańt. Penzań jonksto — 1 100 lomande sede lamo. Ušmovijs kučomaś ušodovś ožokovoń 10-ce čistë, koda vese Rossijavańt. Ravošoń jonkskańt, kona teke vejkev sovi Erźań Mastors, dï Obran ošoń jonkskańt ušmovijen komissariatnë śoksen cifrat eźt jovta.

Viďajkin kemevtize: ušmovijs sajeztnen a sovavtsïź SUO-ń tevtnes dï a kučsïź Doneckoń, Luganskoń, Hersonoń dï Zaporožjen jonkstnës.

Anśak srokoń uredemanten ersi poladovksozo. Medkovsto Klïga Arťom, «Ulemav araśken ajgemańt» juristëzë, onkstïze: peldent a sede alamo sročniktnede, vastnevit lepšťamońt marto, kedčelkstamga sïn kontrakt dï tujemga tortingev. Ajgemańt statistikazo araś, onkstamoś pškadematnen koŕas. Mordovijaso kontraktoń kedčelkstamo kisë pandït, anśak pitneś praś: umaŕkovoń 18-ce čistë respublikaś kepedize ve škań pandomańt 3 milliont vids, dï taštamkovoń 15-ce čistënt žo alkalgavtïze 800 ťožent celkovojen vids. Taštamkovoń 28-ce čistë respublikań pŕavtvetikuroś, Profsojuzoń federacijaś dï Respublikań promïšlenniken vejsënďavksoś sovavtïź eś kolmojonksoń vejsënluvksozost SUO-so pelkskirdićatnen nežedemado regionoń standartońt. Standartońt vejkeś tevtnede — Oboronań ministerstvańt marto kontraktoń tejemań kisë, važodićanten jarmak maksoma.

Ušmovijen komissarońt altamozo anśak ušmovijs sajeztnenen. Kontraktoń kedčelkstïćatnede kortamoś a moli.