Mordovijaso lija mastortnëstë sïća važodićatnen langs kvotaś ve ijen pert kasś alamodo a nilenkirda

Kirťamodo mejle kvotasońt kadovśt 578 tarkat. Te alamodo a nilenkirda sede lamo melen koŕas. Tarkatnen kolmo pelkstnëde kavtotne maksoź Indijań oškajtnenen.

Sehte pek kirtize vešemanzo «Мордовский экологический оператор» šukšoń teven regionoń operatoroś. Indijasto 232 sortirovomań linijań operatoroń tarkas, sonenzë satïška sivedems 131. «Атяшевский» sïvelen kombinatoś eź saje 96 tarkat Turkmenistansto rakšań pečkićatnen dï čapaksoń formovščiktnen turtov. Ruzajevkań stamo fabrikaś ezinze saje vese 15 tarkatnen Indijasto stïćatnen turtov. Tago kolmo važodemań maksïćat kirtiź kvotast 64 tarkado. Meks sïn isťa tejśt — kijak a sodï.

Seke targostońt respublikań kolmo jonoń komissijaś karmavtïze socialen idemań ministerstvańt dï potmo teven ministerstvańt (ruz. МВД) lovoms ombo mastoroń lomantnen pelksënt Mordovijań važodićatnen jutkso. Lovoms eŕavi eś mastoroń lomantnengak, konat kirdij mastoroń luvksoń koŕas saśt eŕamo respublikav. Isťa komissijaś topavtï federaloń meremańt: regiontnënen maksoź, eś mastoroń lomantnen marto, dï lija mastorongak, Rossijań ojmen-kojen pitnen javića, lomantnen marto, važodemań algoritma. Meze sovi te algoritmanten — kijak a sodï.

Aťań Ezemeś, ožokovoń 13-ce čistë, noldïze erźań kelsë javoľavtomanzo. Ezemeś śulmi kvotań kasomańt erźań, mokšoń dï tataroń veletnesë školań, poliklinikań, kluboń dï kuľturań kudoń pekstamotnen marto. «Problemańt undoksozo avoľ važodeme sïćatnesë — ekonomikasońt. Źars respublikań savkstnë tuit Moskovov, źars maštovi velen socialen infrastrukturaś, źars tesken od lomantnen araś važodema tarkast dï perspektivast, — kodamo auľ ule „važodića kedtnen a satomaś“ karmi pešťavomo lija mastortnëstë uskomaso», — jovtaź javoľavtomasońt.

Aťań Ezemeś jovtïnze melkarmavtomanzo. Vasenceś — nejke lotkavtoms lija mastoroń lomantnenen važodema tarkas merematnen maksomańt se škas, źars respublikasońt a uli velmevteź socialen infrastrukturaś, źars tesken erićatnen a ulit melstuića važodema tarkast dï źars migracijań politikaś a kundï važodeme undoks raśketnen interesëst langs. Mordovijań kirdivijtnen pelde arsijkuroś karmavtï vesen turtov panžado doklad: kin vešemań koŕas dï kin interesën vanstaź kepedezel kvotaś 147 tarkasto 854 tarkas dï kodat predprijatijatne terdit lija mastortnëstë sïća važodićatnen.

Lija melkarmavtomatne — lotkavtoms veletnesë školań, poliklinikań, kluboń dï kuľturań kudoń pekstamotnen, veľavtoms respublikanten esenzë savkstnën dï eś melsë migracijań politikańt veťamo meltopavtomańt, tejems regionoń vese školatnesë erźań dï mokšoń keltnen tonavtomańt tevpeks, isťa sïćatnen ejkakštnënengak.