Erźań sodïdejtne, 2022 ijestënt sajeź, eźt kučno eś eńaldoma-pškadematnen, estën sodïjčin premijań konkursonten

Isťa merś Ineskeraśken programmańt koordinatorozo Marika Alver. 2026 ijestë sajeź, kučomośkak Rossijasto kardaź: konkursoś panžado anśak kordon tombale iskuvićatnen turtov.

Ineskeraśken programmań premijado eńaldoma-pškadematne, erźań iskuvićatnen pelde, eźt sakšno 2022 ijestë sajeź 2025 ijent vids, śormadś redakcijas programmańt koordinatorozo Marika Alver. Valonzo koŕas, 2016–2020 ijetnestëjak sïn araselt. 2012–2015 ijetnede, sonzë araś informacijazo, anśak vanstoź śormadovkstnën koŕas, set ijetnestë erźatnen pelde eńaldomat ulneśt.

Jutań kemen ijetnen pert, vejkine erźań čalgavks kadovś 2021 ijestënt, źardo „Mordovskaja mifologija“ enciklopedijańt purnïćatne, saranskejen sodïdejtne Galina Kurševa, Nina Jurčjonkova dï Igoŕ Zubov ulneśt kazeź nacional-sodalmań premijasońt. Premijatnede kavto, ervaś 1250 evro: uralistikado važodemań kisë, kodamo kelsë avoľ ule śormadoź, dï sodalma-važodemań kisë, kona śormadoź uraloń keltnede vejkesënt. Kazit sïnst 2012 ijestënt sajeź, monografijań, pusmoń, vejsën važodemań kisë, konat liśt mejelce nile ijen pert. Eńaldoma pškademańt śormadï se, kin uli melezë, sonś avtorośkak. 2026 ijen pškadematnen učit taštamkovoń 15 čint vids, laureatnën lemest jovtasïź ožokovoń 17 čistë. 2026 ijen uslojtnesë śormadoź: konkursoś panžado avoľ Rossijań Federacijaso erića iskuvićatnen turtovgak.

Meks nile ijen pert arasel omboce premijaś?

Uraloń kelsë śormadoź važodemań kisë premijaś a maksozel 2021 ijestë sajeź 2024 ijent vids. Alverën valonzo koŕas, 2023–2024 ijetnestë te kategorijasońt eńaldomat araselt, 2022 ijestë saś vejke, anśak lija kategorijań, dï 2021 ijestënt sakšnośt kolmo, anśak vejkeśkak ejstëst eź ulne eŕaviks sodalmoń sërenzë vids.

Koordinatoroś jovtaś baška val programmań sïćačident. Aštemkovsto Fenno-Ugrijań promksoś śaldïze, estën Tonavtolmań-Sodalmoń Ministerstvańt, programmań pekstamodo planonzo. „Min arseťano-anokstatano važodeme programmasońt 2027 ijestëntgak“, — śormadś Alver.

Erźatne, koda mokšotnejak, ulit Ineskeraśken programmań raśkerismesënt. Eńaldomat-pškademat erźań iskuvićatnen pelde araselt nilece ijen pert.