Pŕavtlopa · Erźań Mastor dï regionoś
Erźań Mastor dï regionoś 2026 ijen ožokovoń 20 čistë
Mordvań mastoroń bjudžetëś kemekstazel proficit marto. Ožokovonten sonzë asatïksëzë — 1,6 milliard celkovojt
Ožokovoń 14-ce čistë Kirdijpromksoń deputatnë 2026 ijen bjudžetënt savkstnën kepediź 2,5 milliard celkovoj langs, jutavkstnën — 2,6 milliardoń langs. Nej bjudžetsë asatïksëś — 1,6 milliard celkovojt. Acamkovsto son kemekstazel proficit marto: savkstnëde ulneś jutavkstnëde sede lamo.
2025 ijen acamkovsto, Mordvań mastorońt bjudžetëzë 2026 ijent langs, kemekstazel 79,3 milliard celkovojt savkstnën marto, jutavkstnë — 77,8 milliard. Ťurkin Sergej, respublikań finansoń ministraś, sestë altaś: bjudžetëś kolmo ijen pert karmi uleme proficit marto. Ožokovoń polavtomatnede mejle savkstnë — 84 milliard celkovojt, jutavkstnë — 85,6 milliard. Acamkovoń bjudžetënt koŕas savkstnë kasśt 4,7 milliards, jutavkstnë — 7,8 milliards.
Finansoń ministerstvańt pačťamonzo koŕas, od 2,6 milliard celkovojtne molit socialen nežedemas, ľgotań ormamenkstnës dï medicinań tejevkstnën langs. Jarmakt, tede baška, molit uroztnënen sertifikattnëva eŕamo tarkatnes, kommunaloń uredemanten, lomańkuroń transportonten, kirdij vetikurotnes dï municipaloń bjudžetnës. Zńaro maksovi erva jutavksonten, apak jovta.
Kirdijpromksoń pačťamonzo koŕas, asatïksënt a purnït pešťamo dolks sajeź jarmakso. Mejsë sonzë pešťasïź, apak jovta.
Mordvań mastorso purnaź kajavkstnë, ijestë ijes sede lamo, tuit federaloń bjudžetës. Te ijen kavkso kovoń pert kajavksoń kuroś purnaś respublikasońt 102,5 milliard celkovojt. Ejstëst federaloń bjudžetës tuś 29,7 milliard — melen koŕas, 58,7 procents sede lamo; respublikań dï municipaloń bjudžetnënen kadovś 42,2 milliard, 8,7 procents sede lamo. Purnaź erva śado celkovojtnestë, federaloń bjudžetës meľat tuilt 22, nej tuit 29.
