Pŕavtlopa · Erźań Mastor dï regionoś
Erźań Mastor dï regionoś 2026 ijen ožokovoń 17 čistë
Aťań Ezem: źardo sročniktne a ťurit tortingesë, kadïk uredit kudosost
Aťań Ezemeś ožokovoń 17-ce čistë karmavtś: srokoń uredemaś ulevel anśak eś regionso. Ezemeś pškadś erźań, mokšoń, tataroń dï ruzoń ušmovijs sajeztnen teťat-avatnenen: a kučomga sïn ćorast srokoń uredemas dï putomga tevs zakonoń luvtnën — škasoeškema, alternativen uredema, medicinań iskuvamo, juridikań lezdamo.
Ezement valonzo koŕas, sonenzë sejetstë pškalit erźań ušmovijs sajeztnen teťast-avast. Javoľavtomasońt jovtaź: ušmanpelkstnësë oficertnë-komandirtnë lepštit sročniktnen langs, kedčelkstamga sïn kontrakt. «Min sodatano kemenkirtat isťamo tevtnede», — śormadï Ezemeś.
Viďajkin Nikolaj, Mordvań mastoroń ušmovijen komissaroś, ožokovoń 8-ce čistë kemevtś: ušmovijs sajeztnen a sovavtsïź SUO-ń tevtnes, min śormadokšnïnek tede. Ezemeś lemdi isťamo kemevtemańt mančemaks: «Sročniktne ulit koda čavoztnen jutkso, isťa polons sajeztnen jutksojak».
Apongavtoń lovomatne ulit Kurskoń jonkskańt. «Važnïje istorii» dï «Verstka» kuľań sravtnemapeltnen pačťamost koŕas, toso, 2024 ijen umaŕkovsto, ukrainań ušmanvijtnen (ruz. ВСУ) tozoń sovamsto, čavozelt 77 sročnikde a sede alamo. Ukrainań «Hoču žit» projektënt pačťamonzo koŕas, malav 500 sročnikt, konat uredśt jonksosońt, jutaśt polons sajeztnen polavtomavańt.
Ezemeś putś kolmo melkarmavtomat. Vasenceś — srokoń uredemaś ulevel anśak se regionsońt, koso eri sajeześ: «Źardo sročniktne a ťurit tortingesë, kadïk uredit kudosost». Omboceś — kardams srokoń uredemstë «kontraktos verbovamońt» dï iskuvams erva lepšťamońt. Kolmoceś — Mordvań mastoroń dï Penzań, Ravošoń, Obran ošoń jonkstnën čavoź dï polons sajeź erićatnen panžado rejestra. Tozoń ulest sovavtoź avoľ eś melsë kontraktoń kedčelkstïćatnejak.
Te śoksestënt Mordvań mastorso srokoń uredemas kučit malav 500 lomańt, Penzań jonksto — 1 100 lomande sede lamo. Mordvań mastoroś pandï kontraktoń kedčelkstamo kisë: taštamkovoń 15-ce čistënt sajeź ve škań pandomaś — 800 ťoža celkovojt.
