Meďkovoń 28 čistë topodi 60 ijeť «Ermezeń» avtoronť kuloma čistënzë

Erźa raśkenť uliť lamo sodaviks śormadejenzë dï poëtënzë. Anśak Jani Kuldurkajev ašti baška, vesemede sede vere. Alkuksoń pitne sonenzë teškas apak puto.

1928 ijestë «Jakstere tešte» kuľalopasonť lissť «Eŕmeź dï Kotova» Kuldurkajeveń poëmasto peľkstnë. Sonś poëtëś lemďaś sonzë «kezëreń eŕamodo jovks». Baška knigaks son noldazeľ 1935 ijestë dï son te škas avoľ anśak ezize jomavto pitnečinzë — te pitnečiś kasï eŕva ijenť marto. Erźań literaturasonť «Eŕmezde» sede mazïj, śupav kelev, domka dï ejtev śormadovks araś. Erźatneń turtov te uľneś vese meštesë erźačiń ojme košne. Erźatne keńardsť — erźań poëzijasonť sïrememś valdo tešte.

Ruzoń kuratortnë kuroksto loviź «Eŕmezenť» naćionalistëń śormadovksoks. 1938 ijeń taštamkovsto NKVD-ń «baška soveščanijaś» pekstavtïze ťuŕmas erźanť. Ťuŕmatnesë dï lagertnesë sonzë pek naŕgasť. Čavsť — karmavsť lavgamo dï kengeleme eś čumotevtnede, jalgadonzojak. Son kidejak mezejak eź mere.

Kuldurkajeveń kirdsť Komi mastoroń, Novgorod jonksoń dï Džambul jonksoń lagertnesë. Noldïź sonzë anśak 1958 ijeń acamkovsto. Komś ijeń jutaź erźań valmorodejteń jovtasť: son, keľa, lageŕsë ašteś čumovtomo.

Jani Kuldurkajev lageŕstë lisemadonť mejle kadovś śkamonzo… Lambaśkesë Jakov Jakovlevičeń noldïze esenzë kudos Mihail Gorev aťaś, kona eŕaś śkamonzo. Sonzë kudostonť erźań poëtëś kučnoś śormat eŕva kodamo instanćijava. Čumovtomo naŕgazenteń kijak eź lezda. Kudo eź sťavtovo, poëtëś pek sërediľ lagertnede mejle. Mejeľće eŕamo ijezë jutaś pek stakasto, vasolo rodńatneń kudova jakseź. Lamo ška Ja. Ja. Kuldurkajev jutavtś pensijań hlopočamonteń. Činovniktne karmavtnesť sonzë kandoms spravka, kiks son važodś lagertnesë! Lageŕstë liś — naŕgamotne kadovsť. Vese mastoroś uľneś ve pokš lagereks.

Kuloś Jani Kuldurkajev 1966 ijeń meďkovoń 28 čistë, kalmaź Lambaśkesë.

Vejkejak kosojak kevrungo apak sťavto valdo erźań lomanenteń, erźa raśkeń ine morïćanteń… Lambaśke veleń kuľturań kudoso uli büst, tosko — memorialoń užine. Mejś isťa? Kańa «Eŕmezeń» avtoroś anśak Lambaśke veleń poët? Avoľ Erźa Raśkeń?!

Sï ška, źardo Saranoń kunškaso kepedevi mazïj pokš kevrungo lomanenteń, konań izniź eś raśkenť večkemanzo kisë!

Sï škaś!