Pŕavtlopa · Erźań Mastor dï regionoś
Erźań Mastor dï regionoś kuľa 2026 ijen taštamkovoń 12 čistë · 3 menjutkoń lovnoma
Kolmo ťožent lomańt važodit kirťaź važodema či. Važodemavtomaś Mordvań mastorso — 0,3 procenta
Mordovijań „Минсоцтрудзанятости“ (ezinek karma jutavtomonzo erźaks lement), erva targo purnï tablicat važodemań asatïkstënt Saran ošoń zavodtnësë. Redakcijazonok pongś informacija, konadońt kosojak a jovtnit. Erźa Mastor kuľalopamok teize net końovtnën analizënt. Nejeześ — tajmaskavtïmiź! Sede lamo Arzamasoń Bajušen avtoroń materialtnësë.
2026 ijen čadïkovstońt sajeź, saranskojen „Электровыпрямителенть“ 2 003 važodićat važodit kirťaź važodema či: kirťaź či, kirťaź targo, pandomaśkak važodema škań koŕas. Vasńajak te režiment kemekstïź 2026 ijen taštamkovońt 15 činzë vids, anśak, sede tov, acamkovońt 31 činzë vids dï 1 040 lomanen turtov. Kodamo te pelksëś, zavodso vese važodićatnede, panžado sodamoliśmatnestë eź mujeve: mejelce informacijańt „Электровыпрямителесь“ nevtize 2021 ijedent. Sestë toso važodśt 2 489 lomańt.
„Электровыпрямителесь“ isťamo a śkamonzo. 2026 ijen čadïkovoń vasence činten kavkso organizacijaso 3 111 lomań važodś kirťaź važodema či: vijev elektronikań teićadońt baška — Saranskojen valdotehnikań zavodoś „Лисма“ (440 lomańt), „Промтракторонь“ purnamo tarkaś (234 lomańt), „103 Арсенал“ (230), Pejkužoń radiopelksën zavodoś (186).
Taštamkovoń 2 činten isťa važodićatnede 1 818 — koto organizacijaso. Meľat, jakšamkovsto, isťa važodićatnede ulneś anśak 100 lomańt, setkak vejke predprijatijaso.
Ten pingstë „Valdotehnikań“ zavodoś bankrotoks veľavtomań procedura alo: javoľavtozel tede 2024 ijen čadïkovsto, dï varštnemaś ušodovś 2025 ijen ejźurkovsto. Se škastońt, kunškariśmen zńaroksten koŕas zavodsońt ulneś 934 važodićat.
Respublikasońt, te vese škań pert važodemań asatïkseś kirdevś 0,3–0,4 procentën jutkso — 1,3 sajeź 1,6 ťožent lomań vids.
2026 ijen vasence kvartaldo mejle, ministerstvaś javoľavtś važodema asatïksën alamolgamodo: važodemavtomotnede — 1 279 lomańs, te 0,3 procent. Anśak ten pingstë, lomantnen, konat važodit kavkso čassto sede alamo, eźt lovo: sïnst, keľa, uli važodemast.
Sïnś tablicatne — „Работа в России“ platformaso, važodema maksïćatnen turtov, karmavtoź ćotavks; formatne kemekstaź 2024 ijen čadïkovoń 16-ce čistënt „Минтрудонь“ karmavtomasońt №195n, baška likvidacijado, važodićań zńarokstent eś melsë alamolgavtomado, važodemavtomo aštemado dï kirťaź važodema čident.
Net tablicatnen ministerstvaś kučnï kunškačistë „vedomstvajutkoń“ komissijatnes sovsićatnenen. Ministerstvań ćotavkstnësë, respublikań kirdij kuľań sravtnemapeltnesë, 2026 ijedent te informacijaś araś.
Meze kandï te kirťaź važodema čiś važodićatnen turtov, redakcijanten jovtneś „Электровыпрямительсэ“ važodića, kona eńaldś lemenzë a jovtamodo:
Lomantne botnït, tede baška mezejak. Pelit jomavtomo se važodemańtkak kodamo uli. Kodamojak kommunikacija pŕavtnën pelde araś. Minenek merit, keľa, kirdevede. A koda kirdevems? Pitnetne kasït, kommunalkaś ožokovsto pitnelgadï — toso kingak učomo-kirdeveme meleś araś.
Ožokovdońt važodićańt valonzo videt. Rossijań pŕavtvetikuroń karmavtomasońt, 2025 ijen sunderkovoń 25 čistënt, kommunalkań kis pandomaś kasï 2026 ijen ožokovoń 1 čistënt sajeź: ruzoń mastorgańt malav 10 procents, a Mordovijańt turtov, indeksën verce lamoksten rismetnesë, nevteź 11,9 procent.
Seke kovtnëstë, źardo „Электровыпрямительсэ“ sovavtïź kirťaź čint, zavodońt polavtovś kontroltopavtïća akcionerëzë. 2026 ijen jakšamkovoń 30 čistë, kapitalstońt liś ООО „Корпорация развития Республики Мордовия“ — sonzë ulneś 29,53 procent, kadovś mezejak. Davolkovoń 5 čistë, tveren ООО „Холдинг Транспортные Компоненты“ kepedize eś pelksënt 29,91 sajeź — 59,44 procentën vids, čadïkovoń 8 čistë makś karmavtoma-terdema lija akcionertnënen, dï čadïkovoń 16 činten kepedize eś pelksënt 93,47 procentën vids. Kirťaź važodema čin režiment, 2 003 lomanen turtov, ušodïź seke čadïkovstońt. 2020 ijen umaŕkovsto, seke ajgemań-kastomań Korporacijasońt, 55,663 procent zavodoń vajgel maksïća akcijatnen mikšnemstë, ramićatnen turtov makozel usloj: ulemvel sede tov tejmateven vanstoma — kepedema, važodema tarkań tejema-lamolgavtoma
Kirťaź važodema čis lomantnen aravtoma tuvtaltnëde kijak eź jovta: a zavodoś, a respublikań pŕavtvetikuroś, a profsojuzoś — isťat tolkovamot redakcijaś eź muje.
2025 ijen jakšamkovsto „103 Арсеналсонть“ važodś 573 lomańt, 100 lomantnenen makśt kirťaź važodema či. 2026 ijen taštamkovsto ulneśt kirťaź škasońt 280 — ijenzë pes.
