Kirdivijen vete sërlangot dï vejkejak erźań kandidat

Taštamkovoń 18-ce čistë, valsken kavkso často, Mordovijaso panžovśt 685 kočkamotarkat. Kočkamotne molit kolmo čin pert, targočin čokšnes. Formalnojstë kočkamo čiś vejke — taštamkovoń 20-ce, anśak bjulletentnen maksït śukončistë sajeź. Respublikasońt kočkićatnede 559 358 — te Rossijań «KKK»-ańt (Kočkamoń Kunška Komissija), medkovoń 1-ce čis, informacijanzo koŕas. Vese kampanijatnen langs bjulletentnede rukšnaśt nile milliondo sede lamo — erva kočkićańt langs sisemde lamo: lomantne sait źarïja.

Vejken kirda kočkit respublikań pŕavtońt, Mordovijań vemandatoń okrugońt pelde Kirdijarsikuros deputatońt, Kirdijpromkssońt vese 48 tarkatnen, Saran ošoń arsijkurońt dï lija bujen arsijkuroń deputatnën. Vete kirdivijen sërlangot kavto ojmsema čin pert.

Pŕavtoń kočkamoń bjulletens veti anśak vejkine ki. Respublikań zakonsońt araś eś pŕań kandidatoks javoľavtoma: kandidatnëde javoľavtït anśak set politikań melkurotne, konatatnen uli registracijast. Sede tov kandidatoś jutï municipalnoj filtra — 175-de lamo bujen deputatoń kedčelkst, jutkstost 30–32 bujen dï ošoń sërlangoń, dï kedčelkstnën savi purnams 18-do sede lamo municipalnoj territorijatnestë 23-de. Te a topavtovi, źardo net deputatnën azorost a meri sïnest kedčelkstams.

Erźań organizacijanten te a topavtovi kodajak, apak vano — uli araś vejsën melssamoś. Federalnoj zakonoń koŕas, melkuroń purnamga, eŕavit 500-do sede lamo sovsićat dï otdelenijat Rossijań pelest subjektnëde sede lamoso. A «Politikań melkurotnede» zakonońt 9-ce śormadovksozo kardï nacijań tešks marto melkurotnen tejemańt. Isťamo tešksëks zakonoś lovi raśken interesën idemańt, źardo tede śormadoź ustavsońt, tevveťamo luvsońt eli čarkodevi lemstënzë. Čarkoďt isťa, erźań obščestvańt uli meltopavtomazo moramo, knigań noldamo dï inečin jutavtomo, anśak eś lomanent respublikań pŕavtoń kočkamotnestë, kandidatoks maksomaś, respublikasońt, koso erźatne — undoks raśke, sonenzë kardaź zakonoń koŕas. Erźa lomanenten, pongomga kočkamo bjulletens, erźatnen pelde ikeleaštićaks, eŕavi ulems, vejkedent veserossijań partijatnede, kandidatoks, jutamga se filtrańt pačk. Vete kirdivijen sërlangotnesë, konatatnesë jutït kočkamotne, vejkejak kandidat erźatnen pelde araś. Dï te avoľ kočkamo ciklań tamašań tev. Isťamo sistemańt sťavtïze Moskovoś mejelce 30 ijetnen pert, separatizmań ćudavkstnëde eś pŕańt vanstomga.

Nej sede, meze lisś pŕavtoń tarkas kotoce kandidatońt marto. Taštamkovoń 10-ce čistë, ve targos kočkamotnede ikele, Mordovijań kočkamoń komissijaś kardïze Tulajev Vladislavoń, «Od lomańt» melkuroń kandidatońt, registracijanzo. Ten pingstë, Tulajev kadovś seke okrugońt pelde Kirdijarsikuros kandidatoks dï eś melkuronzo pelde Kirdijpromksos kandidatoks. Registracijań kardamodońt jovtaś ASAFOV.RU; kampanijań spravkań lopaś sonzë statusonzo lemdi lijaks — «снял кандидатуру».

Kirdivijeś, kona kemi rezultatonten, a uŕadï kandidatońt bjulletenstë kočkamotnede targodo ikele dï a čaťmoni tuvtaltnëde. Uŕadït sestë, źardo tago kin liś ulems, eś putoź tarkańt koŕas, sede nejaviksëks. Kadovoź vete kandidattnëstë kolmotne — Geraśkin, Masserov dï Ťurin — molit seke škastońt respublikań dumań vejkine mandatońt kisëjak. Mordovijaso sistemań oppozicijań ezement nuŕkačidenzë, seket lomantne sovit zńarïja bjulletens, dï natoj sestëjak, aštiks lomanent uŕadït.

«Kočkamoń melstujema araś. A mejsë sakšnï mels Mordovijań pŕavtoś? Kodat sonzë meltopavtomanzo? Vese melssamotnes sït Moskovso: kadrań kevkstematnestë sajeź bjudžetënt vids», — jovtïze arsemanzo minek lovnïćaś, Saran ošsto eś teven vetićaś.

Son vide, dï ten kemekstït lovoma teškstnë. 2003 ijestë Merkuškin Nikolaj izńaś pŕavtoks kočkamotnesë 87,34 procentsë, kočkamo tarkatnes saśt 83,18 procent kočkićatnede. 2017 ijestë Volkov Vladimir sajś 89,19 procent, kočkamos saśt 82,01. 2021 ijestë Zdunov Arťom — 78,26 procent, a kočkamos saśt anśak 64,97 procent.

Rezultattońt Mordovijaso sodït ikelev, dï tede sodït vese — seks a molitkak. Moskovonten eŕavi a kočkamo, sonenzë eŕavi sonś processëś dï erićatnen sovavtomast tevs, konań lemezë «выборы»: vide lovoma teškstnë ulit mintemenekkak, eŕavi anśak, ulevelt alost kočkićatnen samost. Sajems sonzë tosto, koso araś melstujema, lisi anśak ve luvso — veťams lomańt konatnenen pandï kirdivijeś.