Sedejrizks javdano...

2012-će ijeń aštemkovoń 14-će čistë 76 ijesë kuloś Rf-ń kuľturań važodićaś, Śormadejeń śulmavksoń veťamkuroń sekretareś, sede mejle — pŕavtoś, Mr-ń Raśkeń poëtëś Kalinkin Ivan Aleksejevič.

Kalinkin I. A. čačś 1935-će ijeń aštemkovoń 23-će čistë Uľanovsk jonksoń Inzań bujeń erźań Čej velesë. Vojnań staka ijetnestë avanzo marto kadïź čačoma velest dï 1944-će ijestënť saś eŕamo Mordovskoj Assr-ń Pokš Ignatova bujev.

Spasskoje veleń školań pŕadomado mejle urenďaś Sovetëń Armijaso. Pŕadïze Ordańbujeń kuľtprosvetučiliščanť.

Ejźurkovoń 1959-će ijestë Ivan Aleksejevičeń terdiź Pokš Ignat bujeń «Znamä truda» gazetav. Goŕkojeń partijań školanť pŕadomado mejle, 1970-će ijestënť, Kalinkin I. A. Pokš Ignat bujeń «Voshod» gazetań redaktor.

1972-će ijestënť Kalinkin I. A. saś Saranov «Erźań pravda» gazetań otdelëń pŕavtoks, kuroksto «Śatko» žurnaloń sekretareks.

1976-će ijestënť sajeź Sssr-ń Śormadejeń śulmavksoń lomań. 1977-1984-će ijetnestë — «Śatko» žurnaloń redaktor.

1984-će ijestë sajeź 2000-će ijes Mr-ń Śormadejeń śulmavskoń veťamkuroń pŕavt.

Kalinkin I. A. sermadś 19 knigat — stihť dï poëmat, «Ava dï lej» stihsë roman. Vasenće knigazo — «Zoŕań mizolkst» — noldaź Saranso 1969-će ijestënť. «Manej pizeme», «Sïrneń śulmo», «Ľomzerks čire», «Piže tolbanďat», «Kizëń meneľ», «Nadežda» stiheń dï poëmań knigatne noldaź Saranso.

Ruzoń keľsë stihotvorenijanzo pečatavsť «Literaturnaja gazeta», «Literaturnaja Rossija», «Naš sovremennik», «Družba narodov», «Neva», «Volga», «Ogonek» gazetatnesë dï žurnaltnesë.

Kunška jonksoń izdateľstvaso noldazeľť «Čeremuhovïj bereg», «Zelenïje kostrï» knigatne. Son sermadś «Dorogami ispïtanij» očerkeń kniga Sovetskoj Sojuzoń Gerojtnede, Pokš Ignatova jenksso čačoztnede dï «Vasoloń kilangso» («V daľnej doroge») povesť.

Sehte reďaviksëks karmaś «Ava dï lej» stihsë romanoś, kona 1988-će ijestënť ruzoń keľs jutavtoź romanoś noldazeľ Moskovso.

«Piče viŕ», «Cvetï družbï», «Pesni s beregov Surï i Mokši» stiheń dï poëmań pusmotneń kisë poëtënteń maksoź Mordoviń goskazneń laureatoń lem.

Son kočkazeľ Mordovskoj Assr-ń Verhovnoj Sovetëń deputatoks (1985), kazeź «Znak Početa» ordensë.

Tuś eŕamostonť vadŕa, čevte ojme lomań, vejsëń tevtneń kis aštića, tuś Tonačiv Erźa. Ivan Aleksejevič Kalinkindë valdo ledstnematne svalškas kadoviť minek sedejs.

Anošoń Tumaj, Kšumanćań Pirguž, Kalaganoń Keŕaz, Kuzovatoń Oľa, Leďajkin Jevgenij, Nujań Viďaz, Maćkazoń Ľofaj, Timofej Timin, Šaronoń Sandra, Eŕušoń Vežaj.