Oznïť ćoratne, liviť avatne...

Veleń Ozks Tašto Kšumanćaso

Teke iśak, a te uľneś aštemkovoń 12-će čistë, Penza jonksoń Pazelvelesë kištś-moraś «Tundoń iľťamo» čiś. Škaś moli, kińgak a kevkstni. Teči vana, meďkooń 9-će čistë «Veleń Ozks». Son 18-će jutavtovś Mordovińa Tašto Kšumanća velesë. Ilaś te — kezëreń, jutavtoviľ erźań vese veletneva. Eŕva veleń uľneś esenzë Maarozo. Eŕva erićaś samstonzo kaiľ vasońkomoro oznoź moda. Sestë jutavtoviľ Ozksoś avoľ kalmazëŕsë, koda nej, a viŕsë, oznoma tarkaso.

Oznomatne ušodovsť «Toramoń» morosto dï štatoloń kirvazstema ilasto (kirvazstize sodaviks lomaneś I.I.Jondolov).

Tede mejle Ozksaťaś, Čingajev Leonid, vejsë sïćatneń mrato pškadsť Ineškipazonteń

«Ineškipaz, Vere Čipaz! Ton, marićaś koda tikše kassï, Ton, neićaś, koda pešte panži, Neimiź, maŕamiź! Śukońatano piľgezëť, Verev kepeďsïnek kedenek, Masterov noldasïnek śukpŕanok. Oznotano erićanok kis, Oznotano raśkenek kis, Eńaldtano ejdenek kis, Kardazso rakšanok kis. Ineškipaz! Maket tenek Sëťme, lembe pizemeť, Valdo, Manej čiť, Čačost-kasost śuronok, Kasost-kepedevest ťakanok, Raštïćat ulest avanok. Makst Mastoronteń laďamo, Vejke-vejkeń večkema. Liśmaks parot lisezë, Lejeks eŕmeť čudeze, Kenkšpŕavajak sovazo, Kenkšalgajak sovazo, Kenkšalgajak jutazo. Miń Toneť — Šumbra kši! Ton minenek — šumbrači! Paz, čangodť! Paz, čangodt! Paz, čangodť!

Eńaldomań (molitvań) valtnë, kedeń kepcjeź Ozaťanť meľga, omboksť jovtïť vese sïćatne: iľazo joma raśkeś, vanstovoľ keleś, morotne, ilatne… Ine, lamo pingeń perť valakavtneź eńaldoma valtnë Ineškineń jovtavsť.

Ozavineś (Nataša Suńajkina) seske pškadi vejsë lomantneń marto pokšťań pokšťatneneń, terdi lemest kundamo Tonačiv tuićatneneń

Erźań pokš, pokštineť, Pokšťań, pokštineť, Matraś — ojmaź kiśkinenk, Kepsť mrezë, babineť, Raužo čovaľa modïnenk. Vanna terdťadïź ozksov Kši — salonok vačtamo, Pureń — bragań korštamo. Ašo keďsë paninek, Šožda meľsë pidinek. Sado vaksozonok, Čovoŕavodo jutkozonok, Načtïnk kośke turvinenk, Peštink vačoń pekinenk, Tańškavtïnk sëpej kurginek. Kiń lemezë kundavi, Kiń lemezë stuvtovi, Iľado kežijavto, Iľado ordaškale, Vese tïń — sedejsënek, Vese tïń — minek veŕsë. Miń tïnk ejstë lisinek, Miń tïnenk veľavtano. Sado, vese sado! Iľazt ule ve jendo vanïćat, Iľazt ule ve seľmeń śavadïćat. Pačkodezë, molezë! Paz, čangodť!

Oznomaś pŕadovś. Purnavi Aťań ezem. Kortaviť meľavkstë erźań kelenť-raśkenť kuvalma. Melest jovtïź Ińazoroś Kšumanćań Pirguž, Tašto Kšumanća veleń pŕavtoś P.G.Boľkin, kuľturań ministranť polavtïćazo N.L.Hramov, «Erźań Mastor» gazetań pŕavtoś Nujań Viďaz, nacpolitikań ministranť polavtïćazo A.I.Kaŕgin dï lijatne.

Mazïlgavtïź Oznoma činť konćertsëst moramkurotne «Kelu», «Tolava», «Ŕabinuška». Teke škastonť izńavkst tejsť «Ťušťań nalksemat» peľkstamosonť, pŕavtoś Migunov P.V. Iznićatne: 6 ijesë Kulïgin Jegor dï 55 ijesë Ratnikov Valerij.

Jutavtoś oršamopeleń dï bragań konkurst. Vesemele vadŕatoľť oršamonzo Karina Ľubań. Bragazo tandejdejak tantejeľ Mamajeva Natuń.

Vana isťa, erźaks, anśak erźaks pškalesť erźatne Verepazonteń Tašto Kšumanćaso. Kiń melezë sede lamo sodams te iladonť, varštado «Izvestija Mordovija» gazetas (2010, meďkovoń 12-će či). Toso sonzë lemdiź «Mordvań ozksoks», vesťkak «erźa» valoś pokš-kelej reportažonteń (Spiridonova Jekaterina, erźa) kodajak eź keľgsťavo.

Nujań Viďaz