Od ije marto ojat-jalgat! S novïm godom!

Od ijeś — te valoń kirdema Jutazenť, udalov Kadozenť ikele. Meze teiť, kodamo lezë kandïť eś Raśkenteń? Meze eź tejeve? Meze tejemaľ? Neť kevkstnematne sïť prevzëť.

«Erźań Mastor», kodamo kuľaso kecnevtimiź, kodat tevť topavtozeľť 2010 ijestë?

Vesemede pokš izńavksoś, pŕań apak šna, vana kodamo: stakačitneń langs apak vano, sakšnïń tïnenk ijeń perť, lovnïćat, komśnilejeksť. Vijenëk koros — te avoľ alamo. Eŕavoľ pačkolems nileńgemeń kavksoksť! 48-ť! Lijaks jovtaź, targozonzo vesť. Te bažamoś kirdevi prevsënek kemkotovodo lamo ijeť. Tejeme sonzë ulikčiks… kodajak a tejevi. Tuvtaloś? Avoľ vejke. Vasenćeś — arasť jarmakt. Omboćeś — pek rezï-sëredi Erźań Raśkeś. Alamot kadovsť jarmakoń (lezëń) kaićatnede.

Paz, čangodť!

Uľnesť-araseľť tenk śormadïćat 2010 ijestë?

Sïntemest avoliń pačkole tïnk seľme ikelev. Peštsť dï peštiť sermań pargonok Maćkazoń Lefaj (Moskov), Drigań Tolaj (Samara jenks), Anošoń Tumaj (N-Novgorod jonks), Eŕuš Vežaj (Murman jonks), Prokajeń Konstantin (Penza jonks), Kalaganoń Keŕaz, Šaronoń Sandra, Sazonoń Leva, Kazakoń Peťa pokšťanok (Saran oš), mejeľse škastonť parste nevtiź perań pštičist Boľajeń Sïreś (Kijev) dï Ravoń Anďu (Tatarstan). Kecnevtekšnïmiź Viŕava…

Paz, čangodť!

Kije tenk lezdï finanso?

Vasńajak, teškstasa, sermadïćatne. Uliť isťat, konat sermadstomaso «Em»-ť langs lezdïť — lisneme škastonzo. Karksamga śukońan Graćeń Kaťaneń, Penzaso erića avanteń. Maŕat, Kaťa sazornëm? Meľ putovoľtkak isťa lijatnejak, tejevliń mon eŕva targosto lisnićaks! Śukpŕa Turkičeń Santurnëń, Isajeń Mikoľneń, Prokajeń Kosťaneń (Penza), Anošoń Tumajneń (N.Novgorod). Śuk-śuk Pačalgoń Tolajneń (Kopťažvele, Orenburg jonks), Ŕaboń Pašaneń (Moskovo oš), Kirďanoń Vaśaneń (Tatarstan), Gajnińkank Pičajneń (Krasnojarsk čire), Kirsanov V.P. (Samara). Vesemede beŕanť tevtne Uľan jonksso.

Paz, čangodť!

Kodat, melem sodams, «Erźań Mastoronť» lovnïť Modamastoronť keles?

A peńaćan. Ijeń perť sovsesť sajtëzëm 9295-sť 41 mastorsto! Vesemede lamo, sodavi, lovnosť ejsëm Rossijaso — 4666 lomanť. Rossija meľga eskeli Ukraina. Tesë lovnïćam 196. Kolmoće tarkasot Amerikań śulmavoź Štatnë — 127. Mejle moliť Kuvejt, Germańa… Beŕań te, ijeń perť panžtnize internet-vaľmam anśak vejksëksť Suomis. Rossijaso, vesemede sejeďstë sovsesť sajtëzëm: Moskovoś — 413, Mordovija Respublikaś, Nižnej Novgorodoś — 125, S.-Peterburgoś — 74, Permań čireś — 57, Samara jonksoś — 44…. Vesemezë 45 tarkava. Malav 10 ťožat Internet-lovnïćat! Kecnevti.

Paz, čangodť!

Avat toń, «Em», erźań keleń idema Fondoś. Koda son topavtï lemenzë?

Son, avam, — vasenće nežem. Veťamkurozo (pŕavtoś Kšumanćań Pirguž) lamo vijť putś «Em»-s śormadstomanteń. Vešneś, pškaleś, eńaldś, karmavtś — tejevems moń lovnïćaks. Keńardovtï: 2011-jes Mordovijaso «Em»-s sermadsť, meleń koŕas, sede lamo!

Paz, čangodť!

Kodat lija tevť topavtś gazetadonť baška Fondoś?

2010 ijeń vesemede Ine teveś — Erźań Raśkeń Ozksoś. Son jutavtovś, koda sval, Čukalvelesë meďkovoń 10-će čistë. Sakšnosť oznomo, pokšťań pokšťast lemeń kundamo sisem ťoža malava erźat. Vesemede lamo uľnesť Penza dï Samara jonkstnestë. Uľnesť sakšnïćat mik Kitajstë! Pokš teveks lovoma erźań kovkeŕksëń noldamonť. Kevetejećede! Projektënť avtorozo — Eŕuš Vežaj, tiražonť teićazo Aleksej Godunov. Sravtni, 3000 ekz-t, Kšumanćań Pirguž. Sedejškavań śukpŕa, ćorat, tenk! «Mordvinëń čidenť» mejle lavšolgadś Erźań keleń Čiś. Jalateke 2010 ijestë jutavtovś, 2009 ijeń koŕas sede kelejstë.

Paz, čangodť!

Neť tevtnede miń, lovnïćatne, sodatano, lovnïnek. Meze lija tejevś?

Mon, «Em»-ś, dï Fondoń pŕavtoś jakinek erźań keleń pokščis Obran ošov, Lukojan ošov, Samarav, Penzav. Neť ardnematne lezdïť mujems «Em»-teń lovnïćat, mijems avoľ alamo knigat, kovkeŕkst, gazetat, žurnalt, moro marto diskt. Te maksś, kuš alamoška, lezks jarmaksojak. Sïń pek eŕavkšnïť «Em»-ť noldamsto dï lovnïćatneneń pačťamsto.

Paz, čangodť!

Kodat tevenk literaturań pakśasonť?

Mon, «Em»-ś, uš jovtniń, 2010 ijestë erźań keleń Fondoś, viďstë mereź, Kšumanćań Pirguž, noldïze knigatnestë kniganť, Šaronoń Sandrań «Mastorava» eposonť. Tiražozo… 500 ekz. Pek alamo. Teńgak staka mikšnems. Te kortï vejkede — pektejak pek lavšomsť, ruzïjasť erźatne, kośkś veľť erźań keleś. Alamolgadsť lovnïćatne koda erźań, isťa ruzoń keľsëjak.

«Mastoravado» baška lisś Nujań Viďazoń «Eŕazdenť arseź» ledstnemań knigazo. Tiražozo 500 ekzempľart. Tejak putovks erźań keleń vanstomanteń.

Vana isťa, nuŕkinestë jovtaź, eŕasť, tejsť tevest minek Idićanok, Erźań Fondoś dï sonzë, koj-źardo šoždasto, a koj-źardo avoľ pek, leksića tejterezë — «Erźań Mastor» gazetaś.

Od ije marto, ćerat dï avat, sïreť dï odt, ejkakšt! Kemťano, 2011 ijeń Jakšamaťań kepterezë karmi sedejak śupav avoľ anśak žomkaso dï lambaśkajsë, a parodojak paro tevsë, paro meľsë, kećnevkssë. Kemťano, erźań keleś, minek keńarksonok dï pokštojak pokš meľavksonok, karmi lekseme sede šoždasto! Šumbrači veseneń Od ijeń čitnestë dï svaldojak sval