Śokseń baľagat

Nujań Viďaz

Śokseń kuľbaba baľagaś lemďazeľgak śoksenćeks. Dï te vide. Sonzë sïrneks ćitnića panžovkskenzë ušodïť tija-tuva tipeľdeme anśak meďkovoń pŕadomga. Sede mejle, taštamkovoń sams, vastovat ožo vanovtonzo marto eŕva koso. Ožo ťusoś-čipajenť ťus. Jalateke sonzë veľť mazïjeks, sedejeń kecnevtićaks a loviť. Son, keľa, kortï niń-mirdeń polavtnemado, mančemado.

Śokseś tejni vaseń eskeľkst. Teke ejkakšoń. Nuŕkineť, akemevikst, a kapšićat. Jalateke te uš a kizë. Vetne ekšeť, prakšnïť keľmť, načtniť modanť pizemeť. Panžakaj baľagine, koda ersi panžikovsto, čurosto nejat. Vese, — sodavtanzat meľ, — sïća jakšamotnede kekšnesť.

Vastovat vesť isťamo potmura, isťamo śumora škasto trešnikeń pokšolmaso tikšeń gvozdikine marto dï kirvazi mešťsëť sonzë konďamo vańks jakstere tolnë, eždťanzat kizëń psisë.

Śokseń baľagat.

Alamo ejstëst… Čurosto konaś dï kije panžsïnze seľmenzë… Seks isťa večkeviť.

Avoľ umok, kizëń manej čistë, vastoviń ve sodaviksëm marto. Tenzë kodkemeń malava. Pŕazo počodoź sijań počtso. Avoľ kuvať kortninek literaturań mejeľće kuľatnede. Jovtneś, sonś kirdś keďpesënzë nile-vete ijesë, tundoń baľaga jonov molića nile-vete ijesë tejterne. Sodïń, kazize tenzë omboće nizë.

Ve poët, talaj uš, isťa teń merekšnë: «Pazoś eŕvań vanstozo omboksť uŕvakstomado». Te, moneń maŕavi, esedenzë, eś ućaskanzo langs peńaćaź. Keman, lamot, śokseń čahrań-baľagań noldtnićatnede, isťa a arsiť.