Sado, sado Raśkeń Ozksov!

Kavto-kolmo pingede ikele jutavtnevś erźań vejsëń Ozks — Raśkeń. Purnavkšnosť ejzënzë avoľ vejke ťoža. Kojeś kezëreń. Ule-araś isťamo kodamojak raśkeń — a sodatano. Eŕva sïćaś kandïľ martonzo źarïja komorot jurtstonzo sajeź dï oznoź moda. Ineškipaznëń eńaldomado dï pokšťatneń-sïŕavatneń lemest kundamodo mejle kandoź modaś kajaviľ ve tarkas. Isťa ijestë ijes, pingestë pinges! Tejeviľ Maar (kurgan), konań ťokškes oznomado ikele aravtoviľ dï kiŕvazsteviľ Raśkeń Štatol.

Vanstovoź dokumentnëń koŕas mejeľćede Raśkeń Ozks jutavtozeľ 1629 ijestë nejeń P.-Ignatbujeń Čukalvelenť malaso (Mordovija).

1999 ijestë teke žo tarkasonť veľmevtezeľ Raśkeń Ozksoś ods. Sakšnosť eŕva jondo kavto teža malava. Štatolonť sërezëľ 2 m 10 sm, stalmozo 165 kg.

2004 ijestë Raśkeń Ozksoś jutavtozeľ omboćede. Purnavšnoś nilede lamo ťožat. Štatolonť sërezë 3 metrat, stalmozo 300 kg. Mordovijań pŕavtonť Merkuškin N. I. karmavtomanzo koŕas javoľavtozeľ Mastoroń Pokščiks.

2007 ijeń meďkovoń 14 čistë purnavi Rossijań keles sravtneveź erźatneń Ozksost kolmoćede. Štatolonť sërezë karmi, arsevi, 4 metrat, stalmozo — 800 kg.

Anokstado Raśkeń Ozksonteń. Gazeta, telefon, radio, televidenija veľde, vastovomsto, sermaso jovtnede minek, kosojak a vastnevića kojdenť.

Makstnede vejkenk-vejkenk turtov Ineškipaznëń eńaldomań, pokšťanok-sïŕavanok lemest kundamoń valtnëń, tonavtnink sïnst. Anokstado erźań oršamopeľť, morot. Sval kirdede meľsënk modań sajema-uskoma melenť.