«Purgaz» minek jutkso

Nuŕkinestë kartinanť avtordonzo, Petr Sergejevič Malïševde

Ućaskanť a mezť vašnems — sonś mutanzat. Dï sajďanzat kov melezë. Isťa lisś Kočkuroń bujeń Od Turdak veleń erićanť Petr Sergejevič Malïšev martojak. Eź arsekšnë: savi sajems ružija. Savś sajems. «Ojovaś» erźań ćeraś Ukrainań 1-će frontso. Savś ulems «smertnikekskak» (kadnovś orudija marto jatoń a noldamo). Vinnica ošonť malaso neďavkssonť (bojsënť) jalganzo jutksto kadovkšnoś śkamonzo. Kontuzija marto saś kudov. Ćeranť pokšoľ melezë ulems artïćaks — hudožnikeks. Pŕadïze Penzań Savickij lemsë hudožestvań učiliščanť.

Važodś oformiteleks Tëc-2-së, teatraso, tonavtś čačoma velesënzë ejkakšt. Jutko škasto sermadś kartinat. Kadokšnïze te tevenť. Paŕak, ezť makso poladoms sonzë aparotne, konat kiľkšťasť ojmenzë, eŕamosonť avidečitne, hudožniktneń jutkso amazïj tevtne. Vide, maŕavi, tejak: kactakšnïze večkeviks tevdenzë velesë eŕamoś, pevteme meľavkstnë, peń asodïća kudoń-kardazoń tevtne. Nile ejkakšt. Eŕavś sïnst tŕams-kastoms. Nejgak, ijenzë langs apak vano, koťmi kudoso-piresë, kirdi kemkavtovo neškť.

Veľmevtize dï sïremtize sermadomań jožonť Abramov Vladimir knigasonzo «Po sledu vremeni». Knigaś, koso jovtnevi erźań lamo ine lomantnede: Purgaz, Ťušťa, Alabuga, Vorkadin Moskov, Boľajeń Akaj, Erźamasoń Olena… Sïndest lovnoź seľmenzë ods panžovsť. Kurok čačś kartinaś «Purgaz», meľganzo «Avvakum», «Akaj Boľajeń kulovtomazo», «Nesmejan Vasiľeveń kulovtomazo», «Čapajevskoj ataka», «Onava»…

Hudožnikeś nej arsi «Erźamasoń Olena» kartinanť sermadomadonzo. Paz, čangodť Petr Sergejevičneń!

Erźań istorijadonť sermadïćatnede vejke kedeń surdo avoľ lamo. Peliť hudožniktne te temadonť toldo pek. Śukpŕa Peťa pokšťaneń, son eź pele, eź tandado, kundaś te kardaviks temanteń.

Mejeľće trešnikenek kainek, raminek «Purgaz» kartinanť dï muinek tenzë tarka Fondoń nupaľnesë. Sado, varštado, neink, kodamoľ Purgaz.

Nujanj Vidjaz