Penzaso jutaś erźań dï mokšoń knigań festivaľ

Jutavtïź Penza jonksoń kuľturań ministerstvaś, M. Ju. Lermontov lemsë Penzań, A. S. Puškin lemsë Mordovijań respublikań bibliotekatne, Šemïšejeń bujeń administraćijaś, tosoń bibliotekaś. Tarkaś — erźań Tašto Demkina vele. Tesë soćiokuľturań ćentra. Festivalev sakšnosť veleń bibliotekartne, školaso tonavtïćatne dï tonavtnićatne. Mordovijasto uľnesť L. G. Merkuškina — Respublikań bibliotekań pŕavt, N. V. Bočkanova, N. V. Mańorova — toso važodićatne, M. N. Motorkina — Oťažbujeń Kozlovka veleń bibliotekań pŕavtoś dï N. I. Išutkin — «Čilisema» žurnaloń pŕavtredaktoroś.

Ve zalsonť moľś kortamo: «Veleń bibliotekaś — raśkejutkoń śulmavksoń teića-vanstïća». Omboće zalsonť — stiheń lovnomań koŕas peľkstamo. Ejkakštnë oršazeľť vese erźaks. Eŕvaś lovnoś vasńa erźań, mejle ruzoń keľsë. Vasenće tarkanť saize Judina Viktorija. Son lovnïze Aleksej Ležikovoń «Armijova veleś» dï Jakov Grigošinëń «Rož zvenit» stihotvorenijatneń. Teškstazeľť Antonova Janań dï Kežapkina Lenań lovnomast. Gajgsť Je. Pätajeveń, A. Martïnovoń, S. Ľuľakinań, A. Arapovoń stihest.

Konćerttëń ikele kortasť: V. Z. Fasgejev — Šemïšejeń bujeń pŕavtoś, V. Ja. Proškin — Penza jonksoń kuľturań avtonomijań pŕavtoś, V. V. Gnusaŕov — Tašto Demkina veleń pŕavtoś, M. N. Osipova dï L. G. Merkuškina — bibliotekań pŕavtnë, N. I. Išutkin — «Čilisema» žurnaloń pŕavtredaktoroś.

Penzań erźatnenene maksozeľť lamo knigat, žurnalt, keńarkst. Mejeľće škatnestë isťamo meroprijatija — knigań festivaľ — jutavtovś vasenćede. Paro ušodksonteń — paro poladoma.