Jovlań Olo karmi jutksonok sval

Lamoneń te ijeń ejźurkovoń 11-će čiś kadovi paro lectnemaks. Te čistënť kemgotovo časso panžozeľ Jovlań Oloneń, “Torama” ansambľań pŕavtonteń, altaź konćertëś. Sakšnïćatne isťamo mazïj, gajgića dï eŕva jondo arseź konćerttë, maŕavi, ezť arsejak.

Madś zalsonť toloś dï sćenanť kerš jono aravtoź ekranstonť pškadś aštićatneneń eŕvaneń sodaviks erźań panarsonzo Olo. Son dï sonzë jalganzo — mazïjť, odt, morïćat — ta-kov moliť, moliť, moliť. Olo eź soda, eli, paŕak, sodaśkak sedejezë, eskeli kulomań asodamonteń. Sodaś-eź, anśak lisś isťa: pačkodś dï sovaś meľganok sïćatneń jutks.

Sakšnosť morïćanť ojanzo-jalganzo, malaviksënzë, čaŕkodićanzo. Jutksost muzïkant, hudožnikť, žurnalist, student, talantov lomaneń večkićat. Saran ošoń kuľturań Ćentrań Pokš zaloś malav peškseľ. Sakšnosť Oloń lemenzë kundamo, paro lamo tevenzë kis śukońamo. Lezdaś son, “Toramado” baška, lija ansambľatneneńgak, moramoń večkićatneneńgak. Koda kenerś, prevs a sajevi.

Konćertëń programmaś topavtovś kavto často lamo škań jutaź. Maŕavś anśak čas. Isťa mazïjstë dï domkasto, vasńajak, arsezeľ. Morasť lamot dï lamo. Veťasť ruzoń keľsë, morïćatkak te keľsënť uľnesť. Te langs apak vano, konćertëś, uľneś isťamo jožomaŕamo — moľś pestë-pes erźaks dï mokšoks. Maŕavsť ejsënzë neť raśketneń ojmest, arsemast, bažamost vandïń činteń.

Mazïjeľ Bujankin Jurijeń (gitara) dï Alaševa Lenań (vokal) nomerëst. Lamoń meľs tusť moramost Komusova Taťanań, Bakičeń Viďajeń, Balaškin Nikolajeń, Paniševa Lenań dï lijatneń. Kuvať zërneś ćapamotnede zaloś kavto… “Toramotnede”: sïredenť — Dulkin Gennadij, Balaškin Nikolaj, Gangejev Oleg, Bujankin Jurij, Acapkin Ivan dï odtonť — Romaškin Andrej, Konurin Voloďa, Gangejev Oleg… Programmasost uľneś, a mezť kavtoldoms, sodavikstëjak sodaviks “Ťušťa” moroś. Kunsolïćatneń ćak ezinze ojmeľgavto vejsëń moroś: “Torama” ansambľaś dï Kurin Aleksandrań džaz-gruppazo (“Torama” — džaz”).

Nevtezeľ pek mazïjstë tejeź, nejeń stiľsë topavtoź baletëń nomer.

Programmanť śupalgavtïź sodamočisë muzïkań dï moroń nomertnëń jutks sovavtoź Olodo lectnematne. Eś vastnemadost, vejsëń tevdest “Torama” dï sonzë pŕavtonzo marto jovtnesť: Aľoškin Andrej hudožnikeś, Surajev-Koroľov Gennadij kompozitoroś, Tultajev Pötr ministraś, žurnalistnë Četvergov Jevgenij dï Mariź Kemaľ. Ulezë mereź, Mariź Kemaleń stihenzë langs Jovlań Olo śormadś kolmo morot dï kolmonest gajgsť te čokšnestënť.

Oloń kulomado mejle jutaś peľ ije.

Son martonok. Lija mastoroń lomantneń martojak. Karmi jutksonok sval. A sťako konćertsënť jovtazeľ meľ: tejems Jovlań lemsë eŕva ijene muzïkantoń turtov maksnevića Kazne; maksovozo son morïćanť tevenzë poladïćanteń.

Mejeľćeks. Alamot sodïť: te konćertëś-rekvijemeś avoľ ule, a važodeveľťkak lamo čiń perť ojmsemań apak soda Kšumanćań Pirguž (Musaľov Grigorij), Mordovija Respublikań vejsëń erźań keleń Idema Fondoń pŕavtoś dï Čigažova Anna, Saran ošoń Kuľturań Ćentrań pŕavtoś. Śukpŕa tenk, lakića sedejť!

Nujań Viďaz