Čačoma Moda langso

Bargov Anatolij Nikolajevič

Vïstavka Muk “Rdk” “Avrora” Pokš Ignatbujesë, Mordovija

2011-će ije, acamkovoń 25 či

A. N. Bargov čačś 1955-će ijeń meďkovoń 22-će čistë Magnitogorsk ošso. Ejkakšpingezë dï odksškazo jutaś Mordovija Respublikań Pokš Ignatbujeń Andrejevka velesë. Pŕadïze Ićaloń pedagogikań tonavtkajenť-učiliščanť (1974), Čuvažoń Mastoroń I. Ja. Jakovlev lemsë pedagogikań institutoń hudožestvań-grafikań kuronť (1991).

1995-će ijestë sajeź Rossijań hudožnikeń Śulmavksoń lomań, 2002-će ijestë sajeź Mordovija Respublikań Śulmavksoń pŕavt.

A. N. Bargov artnićaś — Mordovija Respublikań Pŕavtoń Kazneń dï Rossijań Hudožestvań akademijań sïrneń medaleń Laureat. Maksoź tenzë lija šnamo gramotat dï diplomt.

Škinemasonzo pokš tarka sai pejzažoś dï naťurmortoś («Zimńaja Sura», 1995; «Probuždenije», 1997; dï lijatat). Vanïćatneń meľs tukšnï kolmo peľkstë pokš kartinaś «Raśkeń Ozks», kona sermadozeľ 2000-ń ijestë, kuroksto Erźań Oznomań kojenť jutavtomado mejle.

Artïćanť artovksonzo nevtnevsť teskeń, regiońutkoń dï mastoŕutkoń vïstavkatnesë. Tede kortïť ošoń lemtne, koso raštavsť kecnemat: Saran oš, Samara, Šubašar, N. Novgorod, Moskov, Vologda, Saratov, Minsk, Vena… Tede baška uľneś raśkejutkoń plenërsë: Poľša, Slovenija, Avstrija, Čehija, Germanija.

A. N. Bargovoń učovića ekspozićijasonť nevteviť sïća vanïćatneneń kolońgemeń artovkst-kartinat. Jutksost, «Raśkeń Ozksto» baška, «Šumbrat, festivaľ!» (2007), «Voskresnïj deń» (2009) dï eŕva kodamo ijestë śormadoź naťurmort: tundoń baľagat, sireneń ćićkat, jaksterestë mizoldïća piont.

Arseťano Bargovoń Tolajneń keńarkst, paro jožo, izńavskt škinemaso dï ajovtaviks keńarkst vastomadonť iskusstvanzo večkićanzo marto.

«Em»-ń teićanzo dï lovnïćanzo