Tija jakaś Erźań keleń čiś! Saran oš. Erźań keleń Či. Anśak erźaks!

«Mordovskij čidenť» mejle Erźań keleń idema Fondoś Erźań keleń Činť teškstïze čadïkovoń 16-će čistë. Kemkavksovoćede. Koda sval, panžićaks uľneś «Torama» morokuroś. Sonzë moronzo kunsolomadonzo mejle purnazeľ aťań ezem dï kirvazstezeľ Štatoloś, jovtazeľ A.P.Ŕabov lemsë Kazneń Laureatonť lemezë — Kazakov Petr Jefimovič. Peťa pokšťanok. Od laureatonteń maksozeľ mazïjstë tejeź-anokstaź Diplom, baľagań pusmo dï kazne — pitnejdejak-pitnej, mazïjstë vikšneź erźań panar. 2010 ijeń paro teveń kis kazezenteń jovtazeľť lamo ojmeń eždića, kajksëń-nastrojenijań kepedića valt, paro arsemat.

Teke marto, jovtazeľ, mezde uš sermadovkšnoś «Em»-e, Ijeń Erźanť lemezë — Eŕuš Vežaj. Tede Diplomoś nevtezeľ vesemeneń, lovnozeľ ejsënzë sermadovksoś. Son «Em»-ń te nomerënť marto kučovi počta veľde Eŕuš Vežajneń.

Te iladonť mejle Erźań keleń čiś poladovś Promksso. Ejsënzë kunsolozeľ javoľavtomaś tevtnede, konatneń teinze erźań keleń idema Fondoś 2010 ijestë. Jovtneś ejstëst Kšumanćań Pirguž, Fondoń pŕavtoś.

Purnazeľ od veťamkuro. Ejzënzë sovasť: Kšumanćań Pirguž, Kalaganoń Keŕaz, Šaronoń Sandra, Kuzovatoń Oľa, Čekajev N. P., Nujań Viďaz, Anošoń Tumaj. Pŕavtoks ods karmaś Kšumanćań Pirguž. Purnazeľ mučkićań-vanïćań komissija. Jovtaź lomantneń kis kedest kepsiź vese.

Konstantinova Lida, Romanova Oľa dï Jogina Taja kecnevtimiź, putsť pe promksonteń kavto moroso.

Pŕadovś Erźań keleń čiń ilaś Eŕźań Stepanoń skuľpturonť kevrungonzo marto vastomaso. Putozeľ piľgenzë vakss roza baľagań pusmo.

Sakšnosť komśte lamo lomanť Penzasto. Śukpŕa tenk, Penzań erźat! Lomanť lamo araseľť. Seń kis vese, vejkeń pes, lovt, kortasť erźaks dï te uľneś, «mordovskojenť» koŕas, alkuksoń Erźań Keleń Či. Ojme vitevtsť, kecnevtsť sïrnede pitnej erźań sïrež valtnë.