Od ije marto, ojat-jalgat! S Novïm godom, druźa!

Ijeń pŕadomaś — te avoľ anśak valoń kirdema ška buhgaltertnëneń. Eŕvaś sonś, eŕva vejsënďavksoś, pŕavtkuroś, vetijkuroś, eŕva lomaneś arsezevi od ijeń karšo čitnestë arsezevi tejezdeń ijeń perť.

Meze, kodat sede reďaviks, prevs kadovića tevť topavtsť «Erźań Mastor» gazetaś dï sonzë čačtïćazo — erźań keleń idema Fondoś?

Vasńa eno gazetadonť, minek kuľalopadonť.

Kecneťano, vasńajak, — sede kelejgadś śormadïćań kužonok. Sodaviks, umok važodića «pšti keľtneń» jutks — Maćkazoń Ľofaj (Moskov), Drigań Tolaj (Samara jonks), Eŕuš Vežaj (Murman jonks), Anošoń Tumaj, Teŕušoń Seŕgu (N-Novgorod jonks), Prokajeń Konstantin (Penza jonks), Petŕań Anďu (S-Peterburg), Kalaganoń Keŕaz, Sazonov Leva, Bikkinin Irek, Kazakoń Peťa pokšťanok (Saran oš) — eskeľďasť dï sovasť ejzënzë od avtort. Vasenćeś ejstëst — Ratanoń Taťu, konań meľs meks-buti tuś Viŕava lemeś. Te — mujevks, te — kecnema, te — izńamo. Mukšnï paro valt, «alga soki», koda kortïť, prevejstë sermadï Boŕušoń Anďamo (Moskov).

Neť lemtneń lemest jovtamsto, sonś sï kevkstemaś: kodamo staťa, ijeń perť pečatazetneń ejstë, tuś sede meľs? Viťkstamo: sonzë jovtams a šožda. Eŕvaś večki mezejak esenzë, eŕvanť esenzë večkeviks temazo, esenzë vanovtozo. Sekskak jovtatano avoľ «Ijeń staťa», a sermadïćatneń lemest. Lamo meľs tuića staťat pečataś toponimikado Sazonov Lev nikolajevič, Eŕźań Stepando paro jovtnemat noldaś Ratanoń Taťu. Dï koda, koda a ledsťams Maćkaz Ľofajeń «Na Hartiju nadejśa, da sam ne plošaj» videčiń valonzo?

Paz, čangodť!

Kavto ijede lamo «Erźań Mastoronť» veľkska čarasť-veľasť raužo, ćarahmanoń kandïća peľť. Vanstïnek, lovnïćat, martonk vejsë, neť tandavtnića meneľ veľkstnëde. Kavto ijede lamo čumondsť pakšanok «ekstremizmaso», «separatizmaso» dï lija pelevtića valso-«izmaso». Vasńa Saranoń ine sudoś, meľganzo te ijeń umaŕkovoń 25 čistë Rossijań inede-ine sudoś mersť: «Erźań mastorso» kodamojak ekstremizma araś. Iľado vešnejak. Sonzë,teńa, «večkeviks jalganok» nardïksëliź gazetań kurostonť videčiń aštemanzo kis.

Te, merema, pandoška izńavks.

Čangodť, Ineškipaz!

Tedejak jovtamo. Kodat kaŕćigant veľkskanok ezť čara, koda krenčtnë ezť karno, kodat stakačiť ezť prakšno, gazetaś sval-sval lisneś škastonzo dï esenzë pokšolmaso. Sval sakšnoś lovnïćanteń dï paro meľsë jovtneś minek kelenť, dï lijatneńgak, jožodonzo. Sonzë keńarkstonzo dï ormadonzo. Lovnïćat, śukpŕa tenk! Tïntemenk son avoľ valgone elezënk. Lezdasť tenek paro śormadstomaso Blinov Anatolij Jegorovič, Tińgajev Viktor Feofanovič (Orenburg jonks), Prokajev Konstantin Vasiľevič, Gračeva Jekaterina Nikolajevna, Sergejeva Anna Ignaťevna, Isajev Nikolaj Stepanovič, Zoričeva Zinaida Vasiľevna (Penza jonks), Jelisejeva Galina Dmitrijevna (Ŕazań jonks), Stepanova Raida Jevstafevna (Moskov oš), Kirsanov Viktor Pantelejevič, Kistanova Oľga Ivanovna (Samara jonks), Andronov A.N.(Tula jonks).

Čangodť, Ineškipaz!

«Erźań Mastoroś» maštoź, meze dï kije langskak apak nevtne, muś ki seneń, kona altïmaso tapardïze moda-mastoronť — internetënteń. Ijeń perť lovnosť «Em»-ť minek sajtstë 3974 lomanť, tejevś son sodaviksëks 52 mastorso. Te, sodavi, sedej viti, kecnevtni, raštï kememat. Lamo teń kuvalma elektronikaso tei Petŕań Anďu dï sonzë kol, prevej jalganzo.

Čangodť, Ineškipaz!

2009 ijeś — lamoń kuvalma keńarksov ije. Taštamkovoń 24 čistë topodsť tenek, «Erźań Mastoronteń», 15 ijeť! Sïnst perť kodat anśak gazetat ezť lisne! Lamot «tov» tusť Mordovijasto, pŕadïź lamot eŕamokist Fintnëń-Ugratneń mastorsojak. «Erźań Mastoroś» — a seľmedems! — eri, važodi, maksï prevť, źaro uliť vijenzë vanstï erźań kelenť, vanstï lija raśketneńgak. Stakaľ, veľť stakaľ «sudoń škatnestë» «čondatneń» kuvalma, te langs apak vano, stakačitneń panseź noldazeľ čačoma čiń, mazïjstë pečataź-artoź nomer. Paz, čangodť! Eŕak Erźań Mastor!

Avoľ alamo 2009 ijeń perť tejś erźań keleń idema Fondośkak. Vasńajak, sodavi, lezdaś — uľneś nardev nežeks «Erźań Mastor» gazetanteń. Veťamkuroś (pŕavtoś Kšumanćań Pirguž) lamo tejś sermadostomasonť. Kadïk isťa kelejstë, koda uľneś lamo ijeń perť, eź teškstavo (tuvtaltnëde jovtninek), jalateke Erźań keleń čiś jutavtovś. Koda sval, 20-ćede purnavkšnoś «Veleń Ozks» Ignat bujeń Tašto Kšumanća velesë (Mordovija)

Erźań keleń idema Fondonť peľde 2009 ijeń panžikovoń 25-26 čitnestë jakaś Suomiv, Heľsinki ošov «Diskriminaćija meńšinstv v Rossii» lamo mastoroń seminaronteń Nujań Viďaz. Tede baška, Jevropań Sovetëś terdtnize sonzë žurnalistëń meľkirdema seminars Moskovov. Te uľneś

Erźań keleń idema Fondoń pŕavtoś, Ińazoroś Kšumanćań Pirguž (Musalev G.D.) jakaś finnëń-ugrań Čiń teškstamo Samarav, Penzav….

Vana isťa, nuŕkinestë jovtaź, eŕaś,tejś tevenzë minek Idićanok, Erźań Fondoś dï sonzë, koj-źardo šoždasto, a koj-źardo avoľ pek, leksića ćerazo — «Erźań Mastor» gazetaś.

Od ije marto, ćerat dï avat, sïreť dï odt, ejkakšt! Kemťano, 2010 ijeń Jakšamaťań kepterezë karmi sedejak śupav avoľ anśak lambaśkajsë, a paro-paro tevsë, paro meľsë, kećnevkssë. Kemťano, erźań keleś, minek keńarksonok dï pokštojak pokš meľavksonok, karmi lekseme sede kelejstë, sede šoždasto! Šumbrači veseneń Od ijeń čitnestë dï sval-sval.