Kuloś erźań ine lomań — Kiźajev Aleksandr Sergejevič

Aleksandr Sergejevič Kiźajev (Oťaž Kizaj) čačś 1951-će ijeń ožokovoń 31-će čistë Nižnej Novgorodso. Služaś armijaso. Kišińov ošoń muzïkań učiliščań vokaloń soľnoj otdelenijań pŕadomado mejle važodś Moldavijań gosfilarmonijaso. Vajgelezë — dramań tenor. Anokstaś soloń źarïja konćertt, programmazonzo sovavtś lamo esenzë morot, vokaľno-instrumentaľnoj miniaťurat, preľudijat. Morot ladseś R. Börnsoń, N. Giľenëń, A. Lupanoń, D. Samojlovoń, V. Bokovoń, N. Rubcovoń stihest langs. Gastrolenzë uľnesť Moskovso, Leningradso, Haŕkovso, Alma-Ataso, Vladivostokso. Konćertsë ve sćena langs lisneś avtorskoj moroń isťat korifejtneń marto, koda Taťana dï Sergej Nikitintnë, Aleksandr Rozenbaum, Georgij Vasiľev dï Aleksej Ivaščenko, Taťana dï Sergej Koposovtne. Šnamoń lembe valt koŕazonzo jovtasť Bulat Okudžava poëtëś, Jevgenij Doga kompozitoroś. Aleksandr Kiźajev kavksť uľneś avtorskoj moroń Vsesojuznoj festivaleń laureatoks — Moskovso dï Saratovso. Son śormadś muzïka «Velikolepnaja šesťorka», «Simfonija № 1» telefiľmatneneń, «Zdravstvujte» sovetsko-itaľanskoj muľtfiľmanteń. Muzïkado baška, śormadś prozajak: jovtnemat, jovkst, novellat. Zepsënzë sval kirdś-kandtneś bloknotke dï śuvoź karandaške: koso iľazo ule, sï prevezënzë arsema, jutavtsï końov langs — iľazo stuvtovo-mensťavo. 1989-će ijestë sajeź eri Saranso. Saranoń 20-će školaso purnaś-tejś «Liśmapŕa» dï «Čińžaramo» vokalo-horeografijań ansambľat. Śormadś «Purgaz ćorïne», «Purgazoń śorma» vejke aktso operat. «Purgaz ćorïneś» nevtezeľ muzdramań teatrań sćena langsto. Mezeks anśak eź savo tenzë ulems operań putomsto-nalksemstë: režisśoroks, librettoń śormadïćaks, konćertmejsterëks, hudožnikeks-postanovščikeks, hormejsterëks, sedićaks, roleń nalksićaks. 1995-će ijestë Mordkizsë lisś «Bažamot» knigazo, konanť śormadïze erźaks dï altïze babanstëń —Irina Födorovna Surodejkinaneń.

Kuloś te ijeń jakšamkovoń 3-će čistë. Tuś eŕamostonť pokš talant marto lomań, erźań keleń kis aštićatneń ejstë vejkeś.

Javdano sedejrizks malaviksënzë turtov.

“Erźań Mastoroń” teićatne dï lovnïćatne