Jala a ni, jala a mirdeń keďsë... Pusmoś altavi Kalinkin Ivanoń čačoma čizënzë

Rossijań kuľturań zaslužennoj važodićanteń, Mordovijań Gosudarstvennoj kazneń laureatonteń dï narodnoj poëtënteń Ivan Aleksejevič Kalinkinnëń 2005-će ijeń aštemkovoń 23-će čistë topodiť 70 ijeť. Son čačś Uľanovsk jenksoń Inzań bujeń Čej (ruzoks Čeldajevo) velesë, 1944-će ijestë sajeź eri Mordovijaso. Tonavtneś Pokš Ignatovań bujeń Spasova veleń kemeń ijeń školaso, služaś armijaso. Pŕadïze Ordańbuje ošoń kuľtprosvetškolanť, Goŕkij ošoń soćiaľno-politologičeskoj institutonť (žurnalistikań peľksënť). Važodś Pokš Ignatovań bujeń Tašto Čamza veleń kluboń pŕavtoks, teke bujeń «Voshod» gazetań redaktoroks.

1976-će ijestë I.A.Kalinkin saś eŕamo Saranov, važodś «Erźań pravda» gazetań kuroń pŕavtoks, «Śatko» žurnaloń sekretareks, Pisateleń vejsënďavksoń litkonsuľtantoks. 1976-će ijeń davolkovsto sovavtozeľ Sssr-ń Sermadejeń vejsënďavksonteń. 1972-će ijestë aravtozel «Śatkonť» pŕavt-redaktoroks. 1984 ijestë sajeź 2000 ijenť pŕadovoms (keveteje ijeť sisem kovt) važodś respublikań sermadejeń vejsënďavksonť pŕavtoks.

Narodnoj poëtës I. A. Kalinkin Mordovijań dï Moskovoń izdateľstvatnesë noldaś stiheń dï prozan 22 knigat. Jutksost stiheń dï poëmań pusmotne: «Zoŕań mizolkst», «Manej pizeme», «Sïrneń śulmo», «Lemzerksčire», «Viťkstamo», «Piče viŕ», «Kizëń meneľ», «Vasolo ki langso» prozań knigaś, «Ava dï lej» stihsë romanoś dï lijat. Stihenzë dï poëmanzo ruzoń keľsë noldaź Mordkizsë: «Otcovskij harakter», «Zelenïje kostrï», «Cvetï družbï», «Nadežda», Moskovoń izdateľstvatnesë: «Čeremuhovïj bereg», «Pesni s beregov Surï i Mokši», «Kostrï», «Koleso», «Ženščina i reka» stihsë romanoś, konań jutavtïze Rossijań sodaviks poëtëś V. I. Kočetkov.

I.A.Kalinkinëń proizvedenijanzo lisnesť dï lisniť nejgak Rossijań sodaviks žurnaltnësë dï gazetatnesë: «Ogonek», «Družba narodov», «Naš sovremennik», «Neva», «Literaturnaja gazeta», «Literaturnaja Rossija». Narodnoj poëtëś proizvedenijasonzo pokš meľ javi kezëreń dï nejeń škatneneń, lomantneń ućaskast nevtemanteń, perťpeľksëń vanstomanteń, čačoma mastoroń večkemanteń, teťań-avań keľvaloń vanstomanteń.

Kalinkin Ivan pokš meľ javi vejsëń tevtneneń. Son kočkazeľ minek respublikań Verhovnoj Sovetëń deputatoks, Rossijań sermadejtneń pravlenijas dï sermadejeń vejsënďavkss sovavtomań komissijań členëks. Avoľ umok kočkaź Mordovijań Śormadejtneń vejksënďavksoń pravlenijas. Literaturaso paro važodemanť kis kazeź Mordovijań kavto Početnoj gramotaso da «Znak Početa» ordensë. Esenzë siźgemen ijetneń poëtëś vastï kočkaź proizvedenijań kolmo tomso. Vasenćenteń sovasť stihotvorenijat, sonetëń kaštazt, «Kiskań eŕamodo» povesteś dï «Ućaska» očerkeś, omboćenteń — kemgolmovo poëmat, kolmoćenteń ods vitneź «Ava da lej» stihsë romanoś.

«Erźań Mastor» gazetanť teićanzo dï lovnïćanzo sedejlembesë arsiť Ivan Alesejevičneń keme šumbrači, sermadomań tevsënť od izńavkst. Neť od izńavkstnë sval keńardovtost lomantneń.