Erźań avat, purnavodo "Litovanť" peŕka!

2003 ijeń jakšamgovoń 17-će čiś kadovi reďaviks tešksëks: te čistënť vasenćede jutavtozeľ erźań avań pokš promks. Sćenanť veľkska pokš bukvaso śormadoź terdema: “Erźań avat, purnavodo “Litovanť” peŕka!” Erźań dï mokšoń teatras sasť avatne Saransto, Dubinkań, Oťažveleń, Ordańbujeń, P-Ignatoń, Čaunzań dï lija erźań bujetnestë. Zalsonť mokšoń avań “Jurhtava” vejsënďavksoń peľde delegaćijaś, sïćatne eŕva kodamo učreždenijatnestë, žurnalistt.

Štatoloń kirvaztema dï moroń moramo kojenť topavtomado mejle ušodovś promksoś.

Tejezdenť jovtneś Ščankina Raisa Borisovna, “Litovań” pŕavtoś. Son pačťaś, keľa, mejeľće ijetnestë jutavtozeľť avoľ alamo eŕva kodat meroprijatijat: konćertt, promkst, ozkst, vastovomat… Sïnst tejeź sede vijevgadś vejsënďavksoś, tejevś sede sodaviksëks.

Jovtnemanť pŕadomga paročiń arsemat “Litovaneń” dï erźań avatneneń jovtaś mokšoń avatneń peľde “Jurhtava” vejsënďavksoń pŕavtoś Peterburgskaja Anastasija. Tede mejle poladozeľť kortamotne erźań kelenť jožodonzo dï sonzë parolgavtomadonzo. Jovtïź teń kuvalma melest 16 kortïćat.

Razguľajeva Taťanań. Jovtnemazo domka, lamo ćifra marto. (Maksovi baška).

Žegalina Rimma, P-Ignatveleń školań erźań keleń tonavtïćaś, A. P. Ŕabov lemsë kazneń Laureatoś. “Erźań velesë erźań kelenteń maksovi nedľazonzo anśak vejke čas, sejak fakuľtativ dï anśak ušodks klasstnësë. Sede tov ejkakštnë ruzïiť, melest čačoma kelezëst jomi. Sekskak lovnoms erźań knigat, erźań žurnalt-gazetat a kineń, sekskak 95% teťatneń-avatneń ejstë kortïť ejkakšost marto ruzks”.

Larina Taťana, radioń žurnalistka “Sijažar” redakćijasto. Radioń fonotekaso lamo erźań kezëreń morot, śormadejeń vajgeľť-kortamot. Lovnïť eś śormadovksost A. Kutorkin, S. Ľuľakina, V. Kolomasov, K. Abramov dï lijatat. Teke marto, eŕva jondo vešiť keďstënek kassetat. Eńaldan tonť, Pötr Nikolajevič, koda kuľturań ministranteń, tejede tiraž. Te kandï pokš lezë minek kuľturanteń. Mon karman lezdamo. Isťamo žo eńaldomam Kadakin Vasilijneń, sodamočiń ministranteń. Školatneń turtov isťat audiokassetatne karmiť alkuksoń baľzamoks.

Cïpkajkina Valentina, Mordovijań universitetëń erźań keleń kafedrań pŕavt. “A čaŕkodevi, meks araś jutksonok Mariź Kemaľ. Son žo ušodokšnïze vasńa ćorań-avań “Mastorava” molemanť-vejsënďavksonť, sede mejle, 1993 ijestë,“Erźava” avań kužonť .

Kuldïrkajeva Jelena, Gospromksoń ikeleń deputat. “Kurok karmiť Pŕavtoń kočkamot. Moń kojsë eŕavi lezdams (kirdems) kočkams te tarkanteń Merkuškin Nikolajeń. Son lamo ijeń perť nevtize pŕanzo prevej, teveń tejeme maštïća azoroks.”

Kšumanćań Pirguž, Musaľov Grigorij, erźań keleń idema fondoń pŕavtoś. Son erźań ćoratneń peľde arseś erźań avatneneń šumbrači, gajgića morot, kelej śolmot dï vijť “Litovanteń”.

Promkssonť uľneś Konakov Valentin, Vetijkuroń (Praviteľstvań) Pŕavtonť polavtïćazo, ministrat dï Mastorpromkssto Gorbačöv Aleksandr.

Maksnezeľť lamo eŕva kodat Šnamoń lemť dï końovt. Ščankina Raisaneń dï Ośajeva Ninaneń maksoź “Mordovija Respublikań zaslužennoj važodića” lemť. Lamotneneń maksozeľť mazïj paro paćat. “Litovań” pokš promkssonť avatne sasť isťamo meľs: lezdams sïća kočkamotnesë Nikolaj Ivanovič Merkuškinnëń ulems Mordovija Respublikań pŕavtoks.

Pŕadovś pokš promksoś nejeń kojtneń koŕas — targaź morgaso, banketsë.

Jutaś promksoś — pokš uliči, kelej eskeľks eŕamosonok, Pazoń tevsënek. Arseťano avatneneń paro jožo dï sede lamomanej čiť.